Ўзбекистонда икки ой ичида табиатга зарар етказганларга 4,33 млрд сўм жарима белгиланган

2021 йилнинг январь—февраль ойларида атроф-муҳитни муҳофаза қилиш соҳасида 8131 та қонунбузарлик ҳолати аниқланган. Бу ҳақда АОКАда ўтказилган брифингда Экология ва атроф-муҳитни муҳофаза қилиш давлат қўмитаси масъул ходими Валижон Иброҳимов маълум қилди.

Маълум қилинишича, ўтган икки ой давомида давлат ўрмон фондига кирмайдиган 8 мингдан ортиқ шарқ чинори, эман, қрим қарағайи, чинорсимон заранг, элдар қарағайи, каштан, шумтол, туранғил ҳамда бошқа 20 турдан ортиқ қимматли манзарали дарахт кесишдан сақлаб қолинган.

Шунингдек, Экология қўмитаси томонидан республика миқёсида ўтказилган 9 мингдан зиёд рейдларда экология ва атроф-муҳитни муҳофаза қилиш соҳасида 8131 та қонунбузарлик ҳолати аниқланган, шундан 96 нафари мансабдор шахсни ташкил этган.

Ҳуқуқбузарларга нисбатан 4 миллиард 333 миллион сўм жарима ва табиатга етказилган зарар учун 3 миллиард 49 миллион сўм даъво белгиланган.

Бундан ташқари, дарахт ва буталарни ноқонуний кесилиши билан боғлиқ 1021 та қонунбузарлик ҳолати аниқланиб, жами 1 минг 650 туп дарахтлар, шундан 768 туп қимматбаҳо дарахтлар ва 643 метр куб буталар ноқонуний кесилганлиги учун қонунбузар шахсларга нисбатан белгиланган тартибда 1 миллиард 251 миллион сўм маъмурий жарима ва 3 миллиард 590 миллион сўм ўсимлик дунёсига етказилган зарар белгиланган.

2020 йил давомида Республика бўйича жами давлат ўрмон фондига кирмайдиган манзарали ва мевали дарахтларнинг хатловдан ўтказилган сони 9 миллион 976 минг 228 тупни ташкил этмоқда. Шунингдек, электрон базага киритилганлари эса 8 миллион 972 минг 889 туп ташкил этмоқда.

Эслатиб ўтамиз, Экология ва атроф-муҳитни муҳофаза қилиш давлат қўмитаси дарахтлар ва буталарни кесишга мораторий бир йилга узайтирилиш бўйича Вазирлар Маҳкамасига таклиф киритган эди. Шунингдек, дарахтларни ноқонуний кесганлик учун жарима миқдори икки бараварга оширилганди.