Shavkat Mirziyoyev 22-fevral kuni “O‘zbekiston Respublikasining Shaharsozlik kodeksini tasdiqlash haqida”gi qonunni imzoladi. Shaharsozlik kodeksining yangi tahriri Qonunchilik palatasi tomonidan 2020-yil 26-avgustda qabul qilingan, Senat tomonidan 2021-yil 6-yanvarda tasdiqlangan.
Yangi kodeks matni hozircha e’lon qilinmagan. Adliya vazirligi kiritilgan asosiy yangiliklarni sanab o‘tdi.
Xususan, kodeksga noyob va alohida muhim obyektlar”, “reklama va axborot obyektlari”, “turar joy obyektlari”, “urbanizatsiya” va boshqa bir qator asosiy tushunchalar kiritildi.
Mazkur kodeksda shaharsozlik faoliyatining asosiy prinsiplari aniq qilib belgilab berildi. Shaharsozlik faoliyati sohasidagi jamoatchilik nazorati va uning shakllari, subyektlari haqidagi normalar mustahkamlandi. Mazkur sohadagi qarorlarning muhokamasida jamoatchilik nazorati ishtiroki ta’minlanishi belgilandi.
Kodeksga yuridik va jismoniy shaxslarga yetkazilgan zarar o‘rni qoplanishining asosiy yo‘nalishlarini belgilab beradigan hamda pudrat uchun davlat shartnomasini ishlab chiqish va tuzish tartibi, pudrat ishlari qat’iy shartnoma asosida amalga oshirilishi bo‘yicha normalar kiritildi.
Shuningdek, shaharsozlik hujjatlarini ekspertizadan o‘tkazishda ekspertlarning huquqlari va javobgarligi aniq ko‘rsatib o‘tildi.
Endilikda chet ellik yuridik va jismoniy shaxslar ham shaharsozlik faoliyati subyektlari bo‘la oladi. Ushbu qonun rasmiy e’lon qilingan kundan 3 oy o‘tgach kuchga kiradi.
2002-yildan beri amalda bo‘lib kelgan Shaharsozlik kodeksi o‘z kuchini yo‘qotib, o‘rniga endilikda ushbu kodeksning yangi tahrirda ishlab chiqilgan varianti kuchga kiradi.
Izoh (0)