Armaniston Qurolli kuchlari bosh shtabi mamlakat bosh vaziri Nikol Pashinyan va hukumatning zudlik bilan iste’foga chiqishini talab qildi. Bu haqda Meduza xabar berdi.
Bosh shtab Pashinyanning taklifiga binoan, Bosh shtab boshlig‘ining birinchi o‘rinbosari Tiran Xachatryan ishdan bo‘shatilgandan keyin shunday talab bilan bayonot bergan. Bayonotga imzo chekkan 40 nafar yuqori martabali harbiy xizmatchining fikricha, Xachatryan “yuzaki o‘ylangan va asossiz sabablarga ko‘ra” ishdan bo‘shatilgan.
Nikol Pashinyan harbiylarning bayonotiga javoban Facebook orqali mazkur bayonotni “harbiy to‘ntarishga urinish” deb hisoblayotganini ma’lum qildi. “Men Yerevandagi tarafdorlarimizning barchasini Respublika maydoniga taklif qilmoqchiman. Tez orada jonli efir orqali jamoatchilikka murojaat qilaman ”, — dedi Pashinyan.
Pashinyan, shuningdek, harbiylar bayonotiga imzo chekkan Bosh shtab boshlig‘i Onik Gasparyanni ham lavozimidan ozod qilganini aytdi.
“Interfaks”ning xabar qilishicha, Bosh shtab bayonotidan so‘ng, Yerevan aholisi “Nikol xoin!” va “Nikol yo‘qolsin” shiorlari bilan baqirib, ko‘chalarga chiqa boshladi. Xususan, odamlar mamlakat Mudofaa vazirligi binosiga yig‘ilmoqda.
Armaniston Mudofaa vazirligi Bosh shtab bayonotiga hozircha izoh bermadi
Ma’lumot uchun Armaniston Qurolli kuchlari Bosh shtabi boshlig‘ining birinchi o‘rinbosari Tiran Xachatryan mamlakat bosh vaziri Nikol Pashinyanning taklifiga binoan ishdan bo‘shatilgan. Bunga Xachatryan bosh vazirning Rossiyada ishlab chiqarilgan “Iskander” raketa kompleksining samarasizligi haqidagi so‘zlarini tanqid qilgani sabab bo‘lgan.
23-fevral kuni Armaniston bosh vaziri 1in.am kanaliga bergan intervyusida 2020-yilning kuzida Tog‘li Qorabog‘dagi mojaro paytida Yerevan qo‘llagan “Iskander” raketalari “portlamagan yoki 10 foiz qismigina portlagan”ini aytgan. Yerevan Today nashri jurnalistlari Tiran Xachatryandan ushbu bayonotga izoh berishni so‘raganida u uzoq kulgan va “bo‘lishi mumkin emas” deb javob bergan.
Izoh (0)