“Amerika ovozi” jurnalisti Navbahor Imomova Amerika Qo‘shma shtatlarida Ommaviy axborot vositalari aholi duch kelayotgan kichik, maishiy muammolarni aslo yoritmasligini, bunga ehtiyoj ham yo‘qligini aytib, muammo fuqaro va tashkilot o‘rtasida hal bo‘lishini bildirdi. Bu haqda jurnalist “Daryo” muxbiri bilan onlayn muloqotida ma’lum qilgan.
Ma’lum bo‘lishicha, Navbahor Imomova ayni kunda Farg‘ona viloyatidagi Chimyon oromgohida bo‘lib o‘tayotgan to‘qqizinchi an’anaviy mediaforumida so‘z olib, bugungi kun o‘zbek jurnalistikasining erkinligi-yu, o‘zbek amaldorlarining OAVga ochiqligi haqida so‘z yuritgan.
“Jurnalist uchun hech qachon yaxshi va ko‘ngildagidek hukumat bo‘lmaydi, hukumat esa, jurnalistga doim ham barcha ma’lumotlarni ochiq-oydin aytishni, bildirishni istamaydi. Har ikki tomonda ham qarama-qarshi tomondan ko‘ngil to‘lmasligi yoki unga to‘laqonli ishonch bo‘lmasligi bor gap”, — dedi Navbahor Imomova.
Jurnalist bugungi kun o‘zbek jurnalistikasi haqida so‘z yuritib, so‘z erkinligi borasida ildamlikka erishilayotganini, biroq O‘zbekiston OAVlari asosan murojaatlarni o‘rganuvchi va xalq nazdida muammoni hal etuvchilarga aylanib qolayotganini yoqlamasligini bildirdi.
“OAV xalq muammosini eshitib, uni omma e’tiboriga havola qilgani yaxshi, albatta. Ammo OAV xalqqa muammoni yechuvchi, uni hal qiluvchi bo‘lib ko‘rinib qolmasligi kerak. Jurnalist ham muammoni o‘rganishdan oldin, murojaatchiga masalani astoydil o‘rganib chiqishini, ammo uning hal etilishi borasida katta va’da bermasligini aytishi lozim. Fuqaro esa, OAVga muammoni hal qiluvchi emas, muammo haqida jamoatchilikka xabar beruvchi vakil sifatida qarashga o‘rganishi shart. Afsuski, bugungi kunda O‘zbekistonda OAVga murojaat qiluvchi fuqarolardan ‘nega jurnalist meni eshitib, muammomni olib chiqmayapti, nega mening ishimni hal qilmayapti, jurnalistlarga prezidentning o‘zi ishonch bildirgan-ku’, degan mazmundagi shikoyatlarni eshitib qolamiz. Yaqinda menga Namangandagi bir maktab direktori telefon qilib, maktabdagi muammoni olib chiqishimni so‘radi. Men esa maishiy muammolarni olib chiqmasligimni bildirdim va mahalliy OAVlarga murojaat qilishni taklif qildim. Direktor esa, respublikadagi OAVlar hech narsani hal etmasligini, hatto respublikadagi eng katta internet nashri uning muammosini uch-to‘rt marotaba olib chiqqanini, biroq masala haligacha hal etilmaganini aytdi. Shunda men OAV muammoni hal etuvchi emas, muammodan jamoatchilikni xabardor qiluvchi ekanligini ta’kidladim. Lekin murojaatni buni tushunishni ham istamadi”, — deydi Navbahor Imomova.
Navbahor Imomova mediaforum ishtirokchilari bilan onlayn suhbati davomida bugungi kun jurnalistlari xalq muammosini o‘rganib, mas’ul rahbarlardan izoh so‘rash bilan bir qatorda fuqarolarning o‘ziga ham talab qilayotgan huquqlaridan tashqari majburiyatlari ham borligini eslatib turishi lozimligini bildirdi.
“Murojaatchi fuqaro o‘z haq-huquqlarin talab qilayotgani yaxshi, albatta. Ammo u o‘z huquqlarini talab qilish bilan birga o‘z majburiyatlarini ham esdan chiqarib qo‘ymasligi lozim. Buni esa, biz — jurnalistlar eslatib turishimiz kerak”, — dedi xorijda faoliyat yurituvchi jurnalist.
“Daryo” muxbiri xalqaro jurnalist Imomova bilan suhbatda o‘zbek amaldorlari, masalan, tuman hokimlari-yu, joylardagi boshqarma boshliqlari o‘zi ko‘rib turgan muammo qachonki OAVda chiqsa yoki ijtimoiy tarmoqlarda tarqalsagina uni bartaraf etishga o‘rganib qolayotganini aytib, AQShda faoliyat yurituvchi amaldorlarda ham shunday holat bor yoki yo‘qligi bilan qiziqdi.
“Yo‘q, AQShda OAVlar odamlarni qiynayotgan kichik, maishiy muammolarni umuman yozmaydi. Bunga ehtiyoj ham yo‘q, aslida. Boisi biror bir tashkilot va fuqaro o‘rtasidagi muammo fuqaroning o‘sha tashkilotga murojaat qilishi bilan yechim topadi. Agar tashkilotning o‘zida yechim bo‘lmasa, fuqaro mahalliy vakiliga murojaat qiladi. Undan ham yechim bo‘lmasa, Kongressdagi vakiliga chiqib, muammoga yechim izlaydi. Odamlarni qiynayotgan kichik va maishiy muammolar shu tarzda o‘z yechimini topadi. OAVlar aralshuviga ehtiyoj ham sezilmaydi. Amaldorlar ham fuqarosi oldida mas’uliyatli ekanligini yaxshi biladi. Tan olish kerak AQSh amaldorlarida ham bugungi o‘zbek amaldorlarida kuzatilayotgan holat, ya’ni muammo toki OAVda yozilmaguncha, ijtimoiy tarmoqlarda chiqmaguncha yechim izlamaslik holati bo‘lgandir, shu sabab ham bundan bir asr avval AQSh OAVda maishiy, oddiy muammolar ham yoritilgan. Biroq bu holat ayni kunda yo‘q. O‘zbek OAV va amaldorlaridagi mazkur holat ham o‘tkinchi, albatta, bu bosqichdan hamma o‘tadi”, — dedi Navbahor Imomova.
Izoh (0)