«Америка овози» журналисти Навбаҳор Имомова Америка Қўшма штатларида Оммавий ахборот воситалари аҳоли дуч келаётган кичик, маиший муаммоларни асло ёритмаслигини, бунга эҳтиёж ҳам йўқлигини айтиб, муаммо фуқаро ва ташкилот ўртасида ҳал бўлишини билдирди. Бу ҳақда журналист «Дарё» мухбири билан онлайн мулоқотида маълум қилган.
Маълум бўлишича, Навбаҳор Имомова айни кунда Фарғона вилоятидаги Чимён оромгоҳида бўлиб ўтаётган тўққизинчи анъанавий медиафорумида сўз олиб, бугунги кун ўзбек журналистикасининг эркинлиги-ю, ўзбек амалдорларининг ОАВга очиқлиги ҳақида сўз юритган.
«Журналист учун ҳеч қачон яхши ва кўнгилдагидек ҳукумат бўлмайди, ҳукумат эса, журналистга доим ҳам барча маълумотларни очиқ-ойдин айтишни, билдиришни истамайди. Ҳар икки томонда ҳам қарама-қарши томондан кўнгил тўлмаслиги ёки унга тўлақонли ишонч бўлмаслиги бор гап», — деди Навбаҳор Имомова.
Журналист бугунги кун ўзбек журналистикаси ҳақида сўз юритиб, сўз эркинлиги борасида илдамликка эришилаётганини, бироқ Ўзбекистон ОАВлари асосан мурожаатларни ўрганувчи ва халқ наздида муаммони ҳал этувчиларга айланиб қолаётганини ёқламаслигини билдирди.
«ОАВ халқ муаммосини эшитиб, уни омма эътиборига ҳавола қилгани яхши, албатта. Аммо ОАВ халққа муаммони ечувчи, уни ҳал қилувчи бўлиб кўриниб қолмаслиги керак. Журналист ҳам муаммони ўрганишдан олдин, мурожаатчига масалани астойдил ўрганиб чиқишини, аммо унинг ҳал этилиши борасида катта ваъда бермаслигини айтиши лозим. Фуқаро эса, ОАВга муаммони ҳал қилувчи эмас, муаммо ҳақида жамоатчиликка хабар берувчи вакил сифатида қарашга ўрганиши шарт. Афсуски, бугунги кунда Ўзбекистонда ОАВга мурожаат қилувчи фуқаролардан ‘нега журналист мени эшитиб, муаммомни олиб чиқмаяпти, нега менинг ишимни ҳал қилмаяпти, журналистларга президентнинг ўзи ишонч билдирган-ку’, деган мазмундаги шикоятларни эшитиб қоламиз. Яқинда менга Намангандаги бир мактаб директори телефон қилиб, мактабдаги муаммони олиб чиқишимни сўради. Мен эса маиший муаммоларни олиб чиқмаслигимни билдирдим ва маҳаллий ОАВларга мурожаат қилишни таклиф қилдим. Директор эса, республикадаги ОАВлар ҳеч нарсани ҳал этмаслигини, ҳатто республикадаги энг катта интернет нашри унинг муаммосини уч-тўрт маротаба олиб чиққанини, бироқ масала ҳалигача ҳал этилмаганини айтди. Шунда мен ОАВ муаммони ҳал этувчи эмас, муаммодан жамоатчиликни хабардор қилувчи эканлигини таъкидладим. Лекин мурожаатни буни тушунишни ҳам истамади», — дейди Навбаҳор Имомова.
Навбаҳор Имомова медиафорум иштирокчилари билан онлайн суҳбати давомида бугунги кун журналистлари халқ муаммосини ўрганиб, масъул раҳбарлардан изоҳ сўраш билан бир қаторда фуқароларнинг ўзига ҳам талаб қилаётган ҳуқуқларидан ташқари мажбуриятлари ҳам борлигини эслатиб туриши лозимлигини билдирди.
«Мурожаатчи фуқаро ўз ҳақ-ҳуқуқларин талаб қилаётгани яхши, албатта. Аммо у ўз ҳуқуқларини талаб қилиш билан бирга ўз мажбуриятларини ҳам эсдан чиқариб қўймаслиги лозим. Буни эса, биз — журналистлар эслатиб туришимиз керак», — деди хорижда фаолият юритувчи журналист.
«Дарё» мухбири халқаро журналист Имомова билан суҳбатда ўзбек амалдорлари, масалан, туман ҳокимлари-ю, жойлардаги бошқарма бошлиқлари ўзи кўриб турган муаммо қачонки ОАВда чиқса ёки ижтимоий тармоқларда тарқалсагина уни бартараф этишга ўрганиб қолаётганини айтиб, АҚШда фаолият юритувчи амалдорларда ҳам шундай ҳолат бор ёки йўқлиги билан қизиқди.
«Йўқ, АҚШда ОАВлар одамларни қийнаётган кичик, маиший муаммоларни умуман ёзмайди. Бунга эҳтиёж ҳам йўқ, аслида. Боиси бирор бир ташкилот ва фуқаро ўртасидаги муаммо фуқаронинг ўша ташкилотга мурожаат қилиши билан ечим топади. Агар ташкилотнинг ўзида ечим бўлмаса, фуқаро маҳаллий вакилига мурожаат қилади. Ундан ҳам ечим бўлмаса, Конгрессдаги вакилига чиқиб, муаммога ечим излайди. Одамларни қийнаётган кичик ва маиший муаммолар шу тарзда ўз ечимини топади. ОАВлар аралшувига эҳтиёж ҳам сезилмайди. Амалдорлар ҳам фуқароси олдида масъулиятли эканлигини яхши билади. Тан олиш керак АҚШ амалдорларида ҳам бугунги ўзбек амалдорларида кузатилаётган ҳолат, яъни муаммо токи ОАВда ёзилмагунча, ижтимоий тармоқларда чиқмагунча ечим изламаслик ҳолати бўлгандир, шу сабаб ҳам бундан бир аср аввал АҚШ ОАВда маиший, оддий муаммолар ҳам ёритилган. Бироқ бу ҳолат айни кунда йўқ. Ўзбек ОАВ ва амалдорларидаги мазкур ҳолат ҳам ўткинчи, албатта, бу босқичдан ҳамма ўтади», — деди Навбаҳор Имомова.
Изоҳ (0)