O‘zbekistonda Instagram va Telegram orqali savdo qiluvchilarga virtual kassa va raqamli kod olish majburiyati yuklanishi mumkin

Davlat soliq qo‘mitasi “Elektron tijorat ma’muriyatchiligini takomillashtirish va uni yanada rivojlantirish uchun qulay sharoitlar yaratish to‘g‘risida”gi Prezident qarori loyihasini muhokamaga qo‘ydi.

Qaror loyihasida belgilanishicha, 2021-yil 1-apreldan boshlab tovarlar (xizmatlar) bilan elektron savdoni amalga oshiruvchi (elektron shaklda xizmatlarni amalga oshiruvchi chet el yuridik shaxslari bundan mustasno), keyinchalik ularga tovarlarning (xizmatlarning) elektron savdosi amalga oshiriladigan internet tarmog‘ida, shu jumladan, ijtimoiy tarmoq va messenjerlarda majburiy joylashtirish uchun maxsus raqamli koddan foydalanadigan xo‘jalik yurituvchi subyektlar o‘z faoliyatining boshlanishi haqida soliq organlarini xabardor qilish tartibi joriy etiladi.

Raqamli kodni olgan tadbirkorlar tovar-moddiy boyliklarni olish uchun elektron shartnomalar, tovar-transport yuk xatlari va ishonchnomalarni rasmiylashtirish, shuningdek, onlayn rejimda davlat soliq xizmati organlariga elektron tijorat doirasida hisob-kitoblar to‘g‘risidagi ma’lumotlarni o‘tkazish funksiyasi mavjud bo‘lgan virtual kassalardan foydalanishi mumkin.

Shuningdek, sotuvchi va yuk tashuvchilar tovar-kuzatuv hujjatlarini “Yuk tashish monitoringi” axborot platformasi orqali kuzatishi mumkin.

Davlat soliq qo‘mitasi 2021-yil 1-sentabrga qadar elektron tijorat subyektlarining Milliy reyestrini modernizatsiya qilishni amalga oshiradi va uning negizida tovarlarning (xizmatlarning) elektron savdosi ishtirokchilarini ro‘yxatdan o‘tkazish va hisobga olishni ta’minlovchi “E-trade” elektron tijoratni boshqarish bo‘yicha yagona axborot platformasi yaratadi.

Mazkur platforma yordamida tadbirkorlar xaridlar tarixi, hisob-fakturalar, elektron kvitansiyalarni kuzatib borish, shuningdek, o‘z mahsulotlarini bepul reklama qilish imkoniyatiga ega bo‘ladi.

Shu bilan birga, quyidagi imtiyozlar berilishi ko‘zda tutilgan:

• O‘zbekistonda jismoniy shaxslarga xizmatlarni elektron shaklda realizatsiyani amalga oshiruvchi chet el yuridik shaxslari qo‘shilgan qiymat solig‘i to‘lovchisi sifatida soliq organlarida hisobga qo‘yishni 2021-yil 1-aprelga qadar amalga oshirganda hisobga qo‘yish muddatlari buzilganligi uchun javobgarlikdan ozod qilinadi;
• 2023-yil 1-yanvarga qadar o‘z faoliyatini boshlagani to‘g‘risida belgilangan tartibda soliq organlarini xabardor qilgan xo‘jalik yurituvchi subyektlar uchun tovarlarning (xizmatlarning) elektron savdosini amalga oshirish natijasida olingan daromad yoki foyda bo‘yicha aylanmadan olinadigan soliq va foyda solig‘ining stavkalari, ular tovarlarning (xizmatlarning) elektron savdosi bilan shug‘ullanadigan Elektron tijorat subyektlarining milliy reyestriga kiritgan, kiritmaganidan qat’i nazar, 50 foizga pasaytiriladi.

2023-yil 1-yanvargacha bo‘lgan muddatga tovarlar (xizmatlar) elektron savdosi bilan shug‘ullanuvchi va o‘ttiz yoshgacha bo‘lgan bitta jismoniy shaxs tomonidan ro‘yxatga olingan tadbirkorlik subyektlariga soliq organlarini xabardor qilgan holda quyidagi soliqlarni foizsiz kechiktirish (bo‘lib-bo‘lib to‘lash) huquqi beriladi:

• mahalliy davlat hokimiyati organlariga ariza bermasdan turib aylanmadan olinadigan soliq, mol-mulk solig‘i, yer solig‘i, suv resurslaridan foydalanganlik uchun soliq bo‘yicha — ularni keyinchalik 24 oy davomida teng ulushlarda to‘lash sharti bilan;
• ijtimoiy soliq va yakka tartibdagi tadbirkorlar tomonidan to‘lanadigan jismoniy shaxslardan olinadigan daromad solig‘i bo‘yicha — uni keyinchalik 24 oy davomida teng ulushlarda to‘lash sharti bilan.

Eslatib o‘tamiz, 2019-yilda Davlat soliq qo‘mitasi blogerlarning ijtimoiy tarmoqlardagi kanallar, personal sahifalarda reklama joylashi va shu yo‘l bilan daromad orttirishiga “noqonuniy faoliyat” deya ta’rif bergan, ijtimoiy tarmoqda reklama joylab pul topayotgan blogerlar patent, ya’ni yakka tartibdagi tadbirkorni davlat ro‘yxatidan o‘tkazish to‘g‘risida guvohnoma olishi kerakligini aytgan, agar ijtimoiy tarmoqlarda reklama orqali daromad ko‘rayotgan shaxs davlatga soliq to‘lamasa, undan texnika vositasi (telefon, noutbuk, planshet, kompyuter) olib qo‘yilishi mumkinligini ma’lum qilgan edi.