Toshkentda bankomatlarga joylashtirish uchun naqd pullarni talon-toroj qilgan “Xalq banki” xodimi qo‘lga olindi, deya xabar qilmoqda Bosh prokuratura.
Qayd etilishicha, Bosh prokuratura huzuridagi departamentning Toshkent shahar boshqarmasi tomonidan “Xalq banki” Chilonzor filiali murojaatiga asosan o‘tkazilgan tergovga qadar tekshiruvda filialning xizmat ko‘rsatish qurilmalari bilan ishlash bo‘yicha bosh mutaxassisi J.M. va boshqalar oldindan til biriktirib, filialning tumandagi 18 ta bankomatlaridan 7 oy davomida jami 2,3 milliard so‘m naqd pulni o‘zlashtirish yo‘li bilan talon-toroj qilganliklari aniqlangan.
Mazkur holat yuzasidan J.M. va boshqalarga nisbatan Jinoyat kodeksining 167-moddasi 3-qismi (juda ko‘p miqdorda o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval O‘zbekistonda bankomatlar soni 10 mingtadan oshgani, O‘zbekistondagi bankomatlar va kiosklarning deyarli 30 foizi bitta bank tomonidan o‘rnatilgani hamda Jizzaxda bankomatdagi pullarni o‘g‘irlamoqchi bo‘lgan yigit qo‘lga olingani haqida xabar berilgandi.
Izoh (0)