“Jang 13 soniya davom etishi kerak: yaqinlashish uchun ikki, zarba uchun bir va hakamning sanog‘i uchun 10 soniya”. Mayk Taysonning eng mashhur iqtiboslari

Boks tarixida shunday jangchilar borki, ular shunchaki sportchi emas, balki undan ham ortiqroq tushunchani o‘zida ifoda etadi. Bunday jangchilar toifasiga Muhammad Ali, Roy Jons, aka-uka Klichkolar, Floyd Meyvezer, Menni Pakyao va bir qator boshqa bokschilarni kiritish mumkin. Ammo ular orasida Mayk Tayson alohida e’tirofga loyiq. Og‘ir vazn toifasida WBC, WBA, IBF va The Ring kamarlari sohibi nafaqat ringdagi harakatlari, balki uning tashqarisidagi harakatlari bilan ham boshqalardan ajralib turardi. Bundan tashqari uning har bir aytgan so‘zlari omma e’tiboridan tushmasdi. To‘g‘ri anglaganingizdek, quyida Mayk Tayson hayotidagi eng mashhur iqtiboslarni taqdim etamiz.

Qachonki qiyin ahvolga tushib qolsangiz, taslim bo‘lish holatingizni yaxshilamasligini o‘zingizga eslating.

O‘rningdan turganingda do‘stlaring sening kimligingni biladi, yiqilganda esa sen do‘stlaring kimligini bilib olasan.

Agar inson yiqilganidan keyin o‘rnidan tura olsa, bu jismoniy kuch emas, balki xarakter belgisidir.

Hech kim ertalab soat 4 da turishni va atrof qorong‘i bo‘lganida yugurishni istamaydi, lekin bu juda kerakli omildir. Buni juda erta qilishimning yagona sababi shundaki, boshqa hech kim qilmasligiga ishonaman. Va bu menga kichik ustunlik beradi.

Jang 13 soniya davom etishi kerak: yaqinlashish uchun ikki soniya, zarba uchun bir soniya va hakamning sanog‘i uchun 10 soniya.

Bir marta xiyonat uchun kechirilgan odam butun hayoti davomida xiyonat qiladi.

Agar ertaga o‘lsam, dushmanlarim bugun o‘lishi kerak.

Men raqiblarimni janglardan oldin qo‘rqitmayman. Bundan ma’ni yo‘q. Men ularni jangning o‘zida qo‘rqitaman.

Men odamlarni urishni yaxshi ko‘raman. Bu aynan men yoqtirgan ishdir.

Biror kishiga qarshi jang qilsam, uning irodasi va jasoratini egallashni xohlayman. Men uning yuragini yulib olib, o‘ziga ko‘rsatishni istayman.

Haqiqiy erkinlik — bu hech narsaga ega bo‘lmaslikdir. Bir sentim ham bo‘lmagan vaqtlar ancha erkin edim.

Raqibimning o‘rnidan turishiga umid qilardim, shunda uni yana yerga qulatishim mumkin edi.

Men sport tarixidagi eng buyuk jangchiman. Agar bunga shubha qilsangiz, hisob raqamimni tekshiring.

Zarbangiz qanchalik kuchli ekanligi emas, balki qanchalik kuchli zarbaga dosh bera olishingiz muhim.

Men hayotda Yaratgan va ko‘cha jangchisidan boshqa hech kimdan qo‘rqmayman.

Jangning eng qiyin qismi — mashg‘ulotdir, eng osoni esa jangning o‘zi.

Afsuski, ko‘pchilik hayotda juda kech oqil bo‘ladi va juda erta qariydi.