Ўзбекистон Журналистика ва оммавий коммуникациялар университети ректори Шерзохон Қудратхўжа босма нашрларда фаолият кўрсатувчи журналистлар билан мулоқотда газеталарнинг «яшаб қолиши» ҳақида сўз юритиб, «Газета керак, албатта, қачонки унинг ўз ўқувчиси бўлса. Мажбурий тартибда обуна қилинган нашр барибир ўқилмайди», деди. Бу ҳақда Фарғона вилоятида бўлиб ўтаётган тўққизинчи анъанавий Чимён медиафорумида сўз борди, дея хабар берди «Дарё» мухбири.
Таъкидланишича, медиафорумга меҳмон сифатида таклиф қилинган Шерзодхон Қудратхўжа «Анъанавий журналистика ва электрон ОАВ рақибми ёки ҳамкор? Ижтимоий тармоқларнинг жамият ривожидаги ўрни» мавзусида сўз юритиб, анъанавий журналистикада қалам тебратаётган журналистлар саволига жавоб берган.
«Янги авлод вакиллари ҳам газетани бажонидил ўқийди, ўқимайди десак хато бўлади. Аммо улар энди газетани қоғозда эмас, гаджетларда ўқийди. Худди бадиий китобларни электрон шаклда ўқиганидек, газетани ҳам шундай ўқийди. Қачонки, газетада уни қизиқтира оладиган материал бўлса. Минг афсуски, бугунги кун ўқувчиси ҳатто анъанавий телевидениени ҳам кўрмай қўйди. Кўради фақат интернетда ўзига қулай пайт, муҳит ҳамда маконда. Газета ишлаб чиқарувчилар ‘бизга газета керак’, дейишяпти. Албатта, керак. Бунга ҳеч ким қаршилик қилмайди, газета кераклигини инкор ҳам этмаймиз. Фақат биз мажбурий обунага қаршимиз. Энди виждонан жавоб беринг-чи, мажбурий обуна қилинган нашр ўқиладими?», — дея журналистларга савол билан юзланди Шерзодхон Қудратхўжа.
Мазкур саволга жавоб берган «Бухоро шифокори» газетаси мухбири Раъно Саидмуродова мажбурий обуна қилинган газета ҳам, албатта, ўқилишини таъкидлаб, «Биз ёшлигимизда ота-онам газеталарга мажбурий обуна бўлиб, газета уйга келгач, бизни шу газетани ўқишга мажбур қиларди. Биз эса, газетани ўқирдик», — деди.
«Ҳозирги кунда болаларни нимага мабжур қилсангиз, улар тескарисини қилади. Шунинг учун келинг, биз уларга газетани улар хоҳлаётган форматда, шаклда берайлик», — деди бунга жавоб берган журналистларни тайёрловчи университет ректори.
«Янги Ўзбекистон» газетасининг Наманган вилояти мухбири Орифжон Жўраев «Сиз бугунги кунда келажак журналистларини етиштириб берувчи университет ректори сифатида босма нашрларнинг келажагига шубҳа билан қарасангиз, сиз раҳбарлик қилаётган олийгоҳни тамомлаган талабаларда эртага газета чиқараман, газетада ишлайман деган шашт бўлармикин», — деб Шерзодхон Қудратхўжага юзланди.
Мазкур саволга жавоб берган Шерзодхон Қудратхўжа «Яна такрорлаб айтаманки, газета яшайди, қачонки унинг ўз ўқувчиси бўлса. Мен газеталар бугунги кун ёшлари истаган форматда уларга маълумот етказишини, ўқувчилар талабидан келиб чиққан ҳолда газета чиқаришни таклиф қиляпман. Интернет нашрлари танлаган йўлни танлаб, газеталар ўз сайтини яратишини маъқуллайман. Майли, ким хоҳласа газета чиқарсин, бу унинг хоҳиши. Фақат маслаҳатимиз у чиқарган газетани кимдир ўқисин», — дея жавоб берди.
Изоҳ (0)