Toshkentda 2021-yildan chiqindilarni saralab yig‘ish boshlanishi haqida xabar berilgan edi. Poytaxt hokimligi matbuot xizmatining 22-fevral kuni “Maxsustrans” DUKda bo‘lib o‘tgan yig‘ilish yakunlariga ko‘ra ma’lum qilishicha, qattiq maishiy chiqindi (QMCh)larni saralagan holda to‘plash tajribasi Toshkentning har bir tumanidagi ikkita mahallada — jami 24 ta mahallada joriy etiladi.
Ushbu mahallalar aholisiga rangli paketlar beriladi. Sariq paketlar — qayta ishlanadigan chiqindilar (qog‘oz va plastik), yashil paketlar organik chiqindilar (oziq-ovqat qoldiqlari, barglar, o‘tlar), kulrang paketlar esa qayta ishlanmaydigan chiqindilar (oyoq kiyimlari, salfetkalar, pamperslar) uchun mo‘ljallangan.
Saralagan holda chiqindilarni yig‘ishni rag‘batlantirish uchun oilalarga QMChni olib chiqish uchun to‘lov tarifi pasaytiriladi.
Qayd etilishicha, chiqindilarni olib ketish uchun haftasiga ikki marotaba rangli: yashil va kulrang-sariq stikerli mashinalar keladi (yozda ko‘proq keladi). Ushbu maqsadda “Maxsustrans” Osiyo taraqqiyot banki grant mablag‘lari hisobidan 59 ta yangi maxsus mashinalarni xarid qilgan va ularga hozirgi kunda stikerlar yopishtirilmoqda.
Ayni paytda tajriba uchun tanlangan mahallalar aholisiga chiqindilarni saralash zaruriyati haqidagi axborotni yetkazish tadbirlari ko‘rib chiqilmoqda. Maktablar va mahalla qo‘mitalarida muvofiq mavzudagi ma’ruzalar, qiziqarli darslar, konsertlar va kichik hasharlar tashkil etish rejalashtirilmoqda.
“Toshkentda to‘planadigan chiqindilar yildan yilga oshib bormoqda va prognozlarga ko‘ra, 15 yildan keyin uning hajmi ikki barobar oshadi. Ushbu vaziyatdagi yagona yechim — chiqindilarni qayta ishlash bo‘lib, buning uchun uni saralash lozim. 2019-yilda Yakkasaroy tumanidagi mahallalardan birida chiqindilarni saralab, to‘plash bo‘yicha birinchi loyiha amalga oshirildi, — deb ta’kidlab o‘tgan hokimlik matbuot xizmati.
Eslatib o‘tamiz, 2020-yilning dekabrida Prezident “Toshkent shahrida maishiy va qurilish chiqindilari bilan bog‘liq ishlarni amalga oshirishni takomillashtirish chora-tadbirlari to‘g‘risida”gi qarorni imzolagandi. Hujjatga ko‘ra, birinchi bosqichda (2021-yilda) Toshkent shahar hokimligi tomonidan belgilanadigan mahalla fuqarolar yig‘inlari hududida chiqindilarni “qayta ishlanadigan” va “qayta ishlanmaydigan” toifalarga ajratgan holda yig‘ish rejalashtirilmoqda.
Ikkinchi bosqichda (2022-yilda) “Maxsustrans” davlat unitar korxonasi tomonidan xizmat ko‘rsatiladigan barcha hududlardagi yakka tartibdagi turar joy sektorida qattiq maishiy chiqindilarni “qayta ishlanadigan” va “qayta ishlanmaydigan” toifalarga ajratgan holda yig‘iladi.
Uchinchi bosqichda (2023-yildan boshlab) barcha tumanlarda chiqindilarni “qayta ishlanadigan”, “qayta ishlanmaydigan”, “organik”, “xavfli maishiy chiqindilar” va boshqa toifalarga ajratgan holda yig‘ish rejalashtirilmoqda.
2019-yilda Toshkent shahridagi maishiy chiqindilar tashlanadigan Ohangaron tumanidagi poligon 98 foizga to‘lgani ma’lum qilingandi. Senator Bahodir To‘ychiyev O‘zbekistonda 2028-yilgacha chiqindilarni to‘plash va olib chiqib ketish xizmati barcha hududlarda 100 foizga yetkazish rejalashtirilganini aytgandi.
Izoh (0)