Toshkent viloyatida 100 ming so‘mlik kupyuralarni tayyorlab, ularni muomalaga kiritmoqchi bo‘lgan shaxslar qo‘lga olindi, deya xabar bermoqda viloyat IIB matbuot xizmati.
Qayd etilishicha, 2021-yilning 10-fevral kuni Toshkent viloyati IIBB Uyushgan jinoyatchilikka qarshi kurashish bo‘limi hamda Toshkent tumani IIB tezkor xodimlari tomonidan o‘tkazilgan tadbir davomida qiymati 55 millionga yaqin qalbaki 100 ming so‘mlik kupyuralarni muomalaga kiritmoqchi bo‘lgan shaxslar jinoyat ustida qo‘lga olingan.
Tafsilotlarga ko‘ra, Toshkent shahrida yashovchi 1991-yilda tug‘ilgan F.R. tanishlari 1997-yilda tug‘ilgan J.T. va A.A. bilan birgalikda noqonuniy ravishda qalbaki pullarni yasab, ularni muomalaga kirgizish maqsadida tayyorlaganida tezkor xodimlar tomonidan daliliy ashyolar bilan ushlangan.
Tadbir davomida ushlangan shaxslardan 58 dona kesilgan, 490 dona qog‘ozda tayyorlanib, kesilmagan qalbaki 100 ming so‘mlik kupyuralar, rangli printer, 2 quti maxsus qog‘ozlar, pichoq va boshqa buyumlar daliliy ashyolar sifatida olingan.
Mazkur holat yuzasidan ushlangan shaxslarga nisbatan Toshkent tumani IIB TB tomonidan Jinoyat kodeksining 176-moddasi 2-qismi (ko‘p miqdorda qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilgan.
Bundan avval Shayxontohurda qalbaki 50 ming so‘mlik kupyuralarni ishlab chiqarish bilan shug‘ullangan xonadon faoliyati fosh etilgani, Samarqandda 100 ming so‘mlik kupyurani qalbakilashtirgan shaxslar ushlangani hamda Namanganda 50 ming va 100 ming so‘mlik kupyuralarni qalbakilashtirganlar qo‘lga olingani haqida xabar berilgandi.
Izoh (0)