Buxoroda fuqaroni tibbiyot xodimi sifatida ishga joylashtirishni va’da qilib, evaziga undan 700 dollar pora talab qilgan katta hamshira qo‘lga olindi. Holat DXX hamda Iqtisodiy jinoyatlarga qarshi kurashish departamentining viloyat boshqarmasi xodimlari hamkorligida o‘tkazilgan tadbirda fosh etilgan, deya xabar berdi “Daryo” muxbiri.
Ta’kidlanishicha, Buxoro shahrida yashovchi fuqaro S.U. ishga joylashish maqsadida viloyat ftiziatriya va pulmonologiya markazi xirurgiya bo‘limiga murojaat qilgan. Mazkur bo‘lim katta hamshirasi Z.A. fuqaroni aldab, markazning mansabdor shaxslari orqali tibbiyot xodimi sifatida ishga joylashtirishini aytib, evaziga undan 700 dollar talab qilgan. Buncha miqdordagi mablag‘ga ega bo‘lmagan fuqaro S.U. holat yuzasidan huquq-tartibot idoralariga ariza bilan murojaat qilishga majbur bo‘lgan.
Ariza yuzasidan departamentning Buxoro shahar bo‘limi hamda DXX viloyat boshqarmasi xodimlari tomonidan tezkor tadbir o‘tkazilgan. Viloyat ftiziatriya va pulmonologiya markazi xirurgiya bo‘limi katta hamshirasi Z.A. fuqarodan o‘z xizmat xonasida 700 dollarni pora tariqasida olayotgan vaqtda qo‘lga olingan.
Mazkur holat bo‘yicha katta hamshiraning harakatlarida firibgarlik va pora berishga undash jinoyati alomatlari mavjudligi inobatga olinib, jinoyat ishi qo‘zg‘atish uchun to‘plangan hujjatlar Buxoro shahar prokuraturasiga yuborilgan. Keyinchalik esa katta hamshiraga nisbatan Jinoyat kodeksining 168-moddasi 1-qismi (firibgarlik) va 28, 211-moddasi 1-qismi (Pora berish) bilan jinoyat ishi qo‘zg‘atilgan. Ayni paytda dastlabki tergov harakatlari olib borilmoqda.
Izoh (0)