Қўшма Штатларда жамоат жойларида ниқоб тақиш мажбурияти 2022 йилда ҳам сақланиб қолиши мумкин. Бу ҳақда АҚШнинг Аллергия ва юқумли касалликлар миллий институти директори, мамлакатнинг юқумли касалликлар бўйича бош мутахассиси Энтони Фаучи CNN телеканалига берган интервьюсида айтиб ўтди, деб ёзмоқда «РБК».
«Фикримча, келаси йил ҳам ниқоб тақиш мажбурий бўлиши мумкин», — деди Фаучи журналист саволига жавобан.
Мутахассиснинг сўзларига кўра, ниқоб режимини бекор қилиш фақатгина кунлик вирус юқтириш ҳолати сезиларли камайиб, аҳолининг катта қисми эмлангач ёки вирус тарқалиш хавфи минимал даражада пасайганидан сўнг эълон қилиниши мумкин.
АҚШда илк бор ниқоб тақиш талаби 2021 йилда жорий қилинди. 1 февралдан аҳолининг жамоат транспорти, аэропорт ва темир йўл станцияларида ниқоб тақиши шарт этиб белгиланди. Икки ёшдан кичик болалар ва муайян тиббий шароитдаги кишилар учун ниқоб тақиш мажбурий эмас.
Бундан ташқари, мамлакат президенти Жо Байден федерал биноларда ва давлат хизматчилари учун ниқоб тақиш мажбурийлиги тўғрисида фармон имзолади. NBC News манбаларига кўра, Байден маъмурияти АҚШнинг барча фуқароларига тўғридан-тўғри ниқоб жўнатиш имкониятини муҳокама қилмоқда.
АҚШда ниқоб тақиш масаласи қисман сиёсий тус олган. Байден бир неча маротаба собиқ президент Дональд Трампни COVID-19 тарқалишига қарши «ҳеч нарса қилмаганликда», «фақат фонд биржасида савдо қилиш ва президентликка қайта сайланиш мақсадидаги сиёсий назариялар билан шуғулланганликда» айблаган эди.
Байденнинг сўзларига кўра, агар зудлик билан чекловлар, хусусан, ниқоб режими ўрнатилганда эди, АҚШда 100 минг кишининг ҳаётини сақлаб қолиши мумкин эди. Трамп ҳам ўз навбатида, иқтисодиётни тўлиқ блокировкага тушириш мумкин эмас, деб жавоб берган эди. «Биз пандемия билан яшашни ўрганамиз, бошқа иложимиз йўқ. Байденга ўхшаб ертўлага беркиниб яшолмаймиз», — деган эди у сўнгги баҳсда.
Президентлик пайтида Трамп бир неча бор жамоат олдида ниқобсиз пайдо бўлган, аммо АҚШ аҳолисини масофа сақлаш имконсиз бўлган жойларда хавфсизлик учун ниқоб тақишга мунтазам ундаб турган.
Қўшма Штатларда коронавирус билан касалланиш ва ўлим ҳолати бошқа мамлакатларга қараганда юқори ўринда. Жонс Ҳопкинс университети маълумотларига кўра, пандемия бошидан бери мамлакатда 28,1 миллион киши коронавирусга чалинган, 498,7 минг киши касалликдан вафот этган. Оқибатида COVID-19 қурбонлари сони мамлакатнинг учта урушдаги талафотларидан ошиб кетган. 2 январь куни АҚШда вирусга чалиниш бўйича кунлик кўрсаткич деярли 300 минг кишини ташкил қилган. 19 февралга келиб ушбу кўрсаткич 106,3 минг кишигача камайган.
Аввалроқ Удмуртия Россия ҳудудлари ичида биринчи бўлиб ниқоб тақиш мажбуриятини бекор қилган эди. «12 февралдан бошлаб ҳудуддаги ниқоб тақиш режими тавсиявий хусусиятга эга бўлади», — дея таъкидлаган ҳудуд раҳбари Александр Бречалов.
Изоҳ (0)