Farg‘ona shahrida ko‘p qavatli turar joylar orasida qurilishlarni to‘xtatish masalasi, mazkur qarorga sabab bo‘lgan omillar hamda shaharsozlikdagi yangi rejalarga bag‘ishlangan brifing o‘tkazildi, deya xabar berdi “Daryo” muxbiri Azizjon Ermatov.
Farg‘ona shahar prokurori Dilmurod Qobulovning ta’kidlashicha, shaharda uylar juda zich joylashgan, ular orasida yangi binolar qurilishi natijasida odamlar hovlisida o‘tiradigan joy ham qolmayapti.
“Aholi nimadan norozi bo‘lyapti? Aholi, asosan, domlar orasidagi qurilishlardan, juda yaqin qurib yuborilayotgan, kotlovan qazilayotgan holatlardan norozi bo‘lyapti. Joyida o‘rganib ko‘rsak, haqiqatan ham bolalar maydonchalari va favvoralar o‘rniga ko‘p qavatli uylar qurilayotganiga o‘zimiz ham guvoh bo‘lyapmiz. Umuman, shahar hududida qancha dom qurilyapti? Qancha qaror qabul qilingan bu masala bo‘yicha? Qani tahlil qilaylik, nima sababdan bunday holatlarga yo‘l qo‘yilgan?
O‘rganish davomida, albatta, tadbirkorlarning manfaatlari inobatga olinadi, ularning huquqlari kafolatlanadi. Ijtimoiy tarmoqlarda noto‘g‘ri tushunchalar paydo bo‘layotgan ekan. Bunga aslo yo‘l qo‘ymaymiz. Qarorlarni o‘rganishda tadbirkorlar bilan muzokara olib boriladi. Lekin noqonuniy, umuman talabga javob bermaydigan holatlar yuzasidan hokimiyat qarorlariga nisbatan munosabat bildiriladi.
Joy yo‘qligi uchun aholi tashqariga chiqmay qo‘ydi. Qo‘shnilar bilan gaplashib o‘tirish, mehr-oqibat degan masalalar juda susayib ketyapti. Chunki o‘tiradigan, gaplashadigan joy yo‘q. Uydan chiqib qarasa, ro‘parasida yetti qavatli yo besh qavatli ‘dom’ turibdi. Avtomashinalar qo‘yish uchun ham joy yo‘q”, — dedi Farg‘ona shahar prokurori Dilmurod Qobulov.
Brifingda ta’kidlanishicha, mazkur ishlarni amalga oshirishda tadbirkorlarning qonuniy huquq va manfaatlariga zarar yetkazmaslik choralari ko‘rilgan.
Qayd etilishicha, Farg‘ona shahrining bosh rejasiga asosan Nurafshon ko‘chasida Mustaqillik shaharchasi, shuningdek, Aeroport ko‘chasida joylashgan sobiq motodrom hududida kichik shaharchalar kompleksi bunyod etilmoqda.
Bundan tashqari, Farg‘ona shahar hududiga Farg‘ona tumanidan qo‘shib olinayotgan 300 gektar yerda yo‘ldosh shaharchalar tashkil qilish bo‘yicha Turkiya va Janubiy Koreya davlatlarining loyiha institutlari tomonidan alohida bosh reja ishlab chiqilmoqda.
Qurilishi to‘xtatilgan tadbirkorlarga aynan shu hududlardan yer maydonlari taklif etilishi ma’lum qilindi.
Avvalroq Farg‘ona shahri hokimi Mirzohid Ubaydullayev ko‘p qavatli uylar orasidagi qurilishlar nega to‘xtatilganiga izoh bergandi.
Eslatib o‘tamiz, Xayrullo Bozorov Farg‘ona shahridagi “Do‘stlik” hamda “Gulzor” mahallalaridagi aholi yashash sharoitlarini o‘rganish jarayonida hududda ko‘p qavatli turar joylar orasida yashil maydonlar hududidagi daraxtlar kesilgani, bolalar va sport maydonchalari buzilgani va o‘rniga yangi binolar qurilishi boshlanganiga guvoh bo‘lgandi.
Viloyat hokimi birgalikda o‘rganish olib borayotgan shahar hokimi va prokuroriga 13-fevraldan boshlab Farg‘ona shahrida ko‘p qavatli turar joylar o‘rtasida olib borilayotgan barcha qurilishlarni to‘xtatish hamda bunday qurilishlarga ruxsat berish bilan bog‘liq qarorlarni bekor qilish yuzasidan topshiriq bergandi.
Shuningdek, Shavkat Mirziyoyevning Farg‘ona viloyatiga tashrifi chog‘ida Farg‘ona shahar Shodiyona mahallasiga kutilmaganda borib, bu yerda aholi bilan uchrashuvi va mavjud holatning o‘rganganligi hududlarda ko‘plab muammolar borligini ko‘rsatgan. Brifingda ma’lum qilinishicha, bugungi kunda viloyat hokimi boshchiligida har bir mahalla fuqarolar yig‘ini “mahallabay” o‘rganilyapti, aholining turmush sharoitlarini yaxshilash choralari ko‘rilmoqda.
Izoh (0)