Vatikan hukumatining farmoniga ko‘ra, tibbiy sabablarsiz COVID-19’ga qarshi vaksinadan bosh tortganlar ishdan bo‘shatilishi mumkin. Bu haqda “Interfaks” xabar berdi.
Vatikan gubernatori Juzeppe Bertello 8-fevral kuni farmonni imzolaganidan so‘ng hujjat atrofida qizg‘in munozara boshlandi. Italiya va dunyoning aksariyat qismida vaksina qabul qilish ixtiyoriy.
Farmonga binoan emlashdan bosh tortish boshqalarga xavf tug‘dirishi mumkinligini hisobga olgan holda vaksina qabul qilish ma’naviy javobgarlik hisoblanadi.
OAVda ushbu mavzu bo‘yicha e’lon qilingan xabarlardan norozi bo‘lgan Italiya aholisi ijtimoiy tarmoqlarda Vatikanni tanqid qila boshladi.
Natijada 18-fevral kuni Vatikan hukumati emlashdan bosh tortishning oqibatlari haqida ogohlantirish hech qanday jazoni anglatmasligini aytib, vaziyatga aniqlik kiritdi. Vatikan gubernatori emlash dasturida ishtirok etish ixtiyoriy ekanligi, shunga qaramay, kimningdir emlashdan bosh tortishi uning o‘ziga va boshqalarga xavf solishi mumkinligi to‘g‘risida bayonot berdi.
Bertello vakolatxonasi emlanishni istamaganlar uchun hukumat ish bilan ta’minlashning muqobil variantlarini izlashga tayyor ekanini ma’lum qildi. Vatikan hukumati emlash masalasida xodimlarga bosim o‘tkazmoqchi emasligi ta’kidlandi.
Biroq Yevropa OAV ma’lumotiga ko‘ra, Vatikan haqiqatan ham emlashdan bosh tortgani uchun xodimlarni ishdan bo‘shatish huquqiga ega: bu chora 2011-yilgi qonunda mustahkamlangan.
OAV Rim papasi Fransiskning COVID-19’ga qarshi emlash g‘oyasini faol ravishda qo‘llab-quvvatlayotganini ta’kidlamoqda. U mart oyida Iroqqa tashrifi davomida unga hamrohlik qiladigan barcha jurnalistlarning koronavirusga qarshi emlanishi kerakligi haqida ogohlantirdi.
Vatikanda besh mingga yaqin kishi ishlaydi. Mamlakatda koronavirusga qarshi Pfizer vaksinasi bilan emlash yanvar oyi boshida boshlangan. Rim papasi Fransisk allaqachon barqaror immunitetni rivojlantirish uchun zarur bo‘lgan vaksinaning ikkala komponentini qabul qilgan.
Shuningdek, Indoneziya poytaxti Jakartada koronavirusga qarshi emlashni rad etganlar uchun jazo tayinlanishi haqida xabar berildi.Qayd etilishicha, ushbu holda poytaxt aholisiga jazoning ikkita usuli — ijtimoiy yordamni uzib qo‘yish yoki 357 dollar atrofida jarima belgilanadi. Jakarta ma’muriyati mamlakatda virus yuqtirganlarning to‘rtdan biri qismi poytaxtga to‘g‘ri kelayotgani sababli mazkur choralar zarurligini ta’kidlagan.
COVID-19’ga qarshi emlash kampaniyasi Indoneziyada yanvar oyida boshlangan. Hokimiyat 15 oy ichida 270 million aholining 181,5 million nafarini emlashni rejalashtirmoqda.
Avvalroq Germaniyadagi keksa insonlar va nogironligi bo‘lgan shaxslarni parvarish qilish bilan shug‘ullanuvchi kompaniyalardan biri koronavirusga qarshi emlanishni istamagan yetti nafar xodimini ishdan bo‘shatgan edi. Bild nashrining yozishicha, Germaniyada vaksinatsiya ixtiyoriy ravishda o‘tkazilmoqda va mazkur xodimlarning infeksiyaga qarshi emlanishdan bosh tortgani sabab ishdan bo‘shatilishi birinchi holat hisoblanadi.
Izoh (0)