AQSh Afg‘onistondan qo‘shinlarini olib chiqib ketishga shoshilmoqchi emas

Vashington o‘z qo‘shinlarini Afg‘onistondan olib chiqib ketishga shoshmoqchi emas. Bu haqda Amerika mudofaa vaziri Lloyd Jeyms Ostin ma’lum qildi, deb yozadi “Interfaks”.

Pentagon xabarida aytilishicha, Ostin NATO bo‘yicha ittifoqdoshlarni AQSh Afg‘onistondan qo‘shinlarini shoshma-shosharlik bilan yoki tashkillashtirilmagan holda olib chiqib ketmasligiga ishontirgan.

Ostinning eslatishicha, AQSh ayni paytda o‘zining “Tolibon” harakati bilan kelishuvini puxtalik bilan o‘rganib, barcha tomonlar uning shartlariga amal qilayotganini aniqlashtirmoqchi.

Eslatib o‘tamiz, 2020-yil fevral Qatar poytaxti Dohada AQShning Afg‘oniston bo‘yicha maxsus vakili Zalmay Halilzod hamda “Tolibon” yetakchisining o‘rinbosari, harakatning Qatardagi ofisi rahbari mulla Abdulla G‘ani Barodar kelishuv bitimini imzolagan edi. Unda Amerikaning barcha qo‘shinlarini Afg‘onistondan olib chiqish ko‘zda tutilgan. “Tolibon” esa o‘z navbatida boshqa terrorchilik guruh vakillarini yashirmaslik va Afg‘oniston hukumati bilan to‘liq muzokaralar olib borish majburiyatini olgan edi.

NATO mamlakatlari mudofaa vazirlari 18-fevral kuni bo‘lib o‘tgan videoanjumanda Afg‘onistondagi vaziyatni batafsil muhokama qilib, ushbu mamlakatga alyans qo‘shinlarini kiritish istiqbollarini ko‘rib chiqdi. Ammo bu borada yakuniy qaror qabul qilinmadi va bu masalani tez orada qaytadan ko‘rib chiqishga kelishib olindi.

2020-yil noyabrida AQSh Afg‘oniston va Iroqda 2,5 ming nafardan harbiyni qoldirishini ma’lum qilgan. Qo‘shinlar 15-yanvargacha olib chiqib ketildgan. Afg‘onistondan 2 ming, Iroqdan 500 kishi chiqarib yuborilishi aytilgan edi. Trampning rejasiga ko‘ra, Iroq va Afg‘onistondan qo‘shinlar 2021-yil maygacha qaytarilishi kerak edi.

2021-yil yanvarida esa Afg‘oniston va Iroqdagi amerikalik harbiylar soni har bir mamlakatda 2,5 minggacha kamaygani xabar berildi.

Keyinroq esa AQShning yangi mudofaa vaziri Lloyd Ostin sobiq prezident Donald Trampning Afg‘oniston va Iroqda qo‘shinlarni kamaytirish qaroridan keyin u yerdagi qo‘shinlar sonini qayta ko‘rib chiqishi mumkinligi haqida xabar berildi.