Venesuelada tibbiyot xodimlari mahalliy aholini koronavirusga qarshi Rossiyada ishlab chiqarilgan “Sputnik V” vaksinasi bilan emlashni boshladi. Bu haqda mamlakat prezidenti Nikolas Maduro Twitter’da ma’lum qildi, deb yozmoqda “RBK”.
“Birinchi bo‘lib ‘Sputnik V’ vaksinasi bilan Miranda shtatida yashovchi Glendi Rivero ismli yosh shifokor emlandi”, — deb yozgan davlat rahbari. Maduro buni “barcha venesuelaliklarga cheksiz quvonch va umid baxsh etgan ajoyib lahza” deb atadi.
2020-yil noyabr oyida Venesuelada “Sputnik V” sinovdan o‘tkazilgan. Sinovda 2 ming kishi, shu jumladan, prezidentning o‘g‘li Maduro Gerra va uning opasi Mariya Tereza ishtirok etgan. Sinovlardan so‘ng Venesuela hukumati Rossiya to‘g‘ridan to‘g‘ri investitsiya jamg‘armasi (RFPI) bilan mamlakatga 10 million dozali vaksina yetkazib berish yuzasidan kelishuv olib borgan. Shartnoma 2020-yil 29-dekabr kuni imzolangan. 30-dekabr kuni Maduro 90 kun ichida mamlakatning 10 million fuqarosini emlashga va’da bergan.
Prezidentning ta’kidlashicha, birinchi bo‘lib shifokorlar emlanadi, ulardan keyin o‘qituvchilar va “Biz — Venesuela” harakati a’zolari vaksina qabul qilishi mumkin.
Avvalroq Mo‘g‘uliston Sog‘liqni saqlash vazirligi “Sputnik V” vaksinasini tezlashtirilgan protsedura bo‘yicha ro‘yxatdan o‘tkazgan edi.
Shuningdek, O‘zbekistonda “Sputnik V” vaksinasini uchinchi bosqich klinik sinovlari natijalari asosida sertifikatlashtirilgan holda ommaviy qo‘llashga ruxsat berilgan. O‘zbekistonda koronavirusga qarshi emlash mart oyining birinchi yarmida boshlanishi ma’lum qilingan.
Ma’lumot uchun, shu vaqtgacha “Sputnik V” vaksinasi Vengriya, Livan, Serb Respublikasi, Jazoir, Argentina, Belarus, Boliviya, BAA, Serbiya, Falastin, Paragvay, Pokiston, Turkmaniston va Eronda foydalanish uchun tasdiqlangan.
Izoh (0)