АҚШ Афғонистондан қўшинларини олиб чиқиб кетишга шошилмоқчи эмас

Вашингтон ўз қўшинларини Афғонистондан олиб чиқиб кетишга шошмоқчи эмас. Бу ҳақда Америка мудофаа вазири Ллойд Жеймс Остин маълум қилди, деб ёзади «Интерфакс».

Пентагон хабарида айтилишича, Остин НАТО бўйича иттифоқдошларни АҚШ Афғонистондан қўшинларини шошма-шошарлик билан ёки ташкиллаштирилмаган ҳолда олиб чиқиб кетмаслигига ишонтирган.

Остиннинг эслатишича, АҚШ айни пайтда ўзининг «Толибон» ҳаракати билан келишувини пухталик билан ўрганиб, барча томонлар унинг шартларига амал қилаётганини аниқлаштирмоқчи.

Эслатиб ўтамиз, 2020 йил февраль Қатар пойтахти Доҳада АҚШнинг Афғонистон бўйича махсус вакили Залмай Ҳалилзод ҳамда «Толибон» етакчисининг ўринбосари, ҳаракатнинг Қатардаги офиси раҳбари мулла Абдулла Ғани Бародар келишув битимини имзолаган эди. Унда Американинг барча қўшинларини Афғонистондан олиб чиқиш кўзда тутилган. «Толибон» эса ўз навбатида бошқа террорчилик гуруҳ вакилларини яширмаслик ва Афғонистон ҳукумати билан тўлиқ музокаралар олиб бориш мажбуриятини олган эди.

НАТО мамлакатлари мудофаа вазирлари 18 февраль куни бўлиб ўтган видеоанжуманда Афғонистондаги вазиятни батафсил муҳокама қилиб, ушбу мамлакатга альянс қўшинларини киритиш истиқболларини кўриб чиқди. Аммо бу борада якуний қарор қабул қилинмади ва бу масалани тез орада қайтадан кўриб чиқишга келишиб олинди.

2020 йил ноябрида АҚШ Афғонистон ва Ироқда 2,5 минг нафардан ҳарбийни қолдиришини маълум қилган. Қўшинлар 15 январгача олиб чиқиб кетилдган. Афғонистондан 2 минг, Ироқдан 500 киши чиқариб юборилиши айтилган эди. Трампнинг режасига кўра, Ироқ ва Афғонистондан қўшинлар 2021 йил майгача қайтарилиши керак эди.

2021 йил январида эса Афғонистон ва Ироқдаги америкалик ҳарбийлар сони ҳар бир мамлакатда 2,5 минггача камайгани хабар берилди.

Кейинроқ эса АҚШнинг янги мудофаа вазири Ллойд Остин собиқ президент Дональд Трампнинг Афғонистон ва Ироқда қўшинларни камайтириш қароридан кейин у ердаги қўшинлар сонини қайта кўриб чиқиши мумкинлиги ҳақида хабар берилди.