AQShda 1967 va 1968-yillarda ishlab chiqarilgan ikkita noyob Ford Thunderbird sotuvga qo‘yildi. So‘nggi 30 yil davomida avtomobillar garajda ta’mirtalab ahvolda saqlangan. Sotuvchi avtomobillarning har birini 2,5 ming dollardan sotib yuborishga tayyor, deb xabar beradi Motor.
Ford Thunderbird Amerika markasining mashhur modeli hisoblanadi. Yarim asr davomida ushbu nom ostida badavlat insonlar uchun ulkan orqa uzatmali sedanlar, kupe va rodsterlar ishlab chiqarilgan. T-Bird Amerika avtomobil bozoridagi mazkur segmentning asoschisiga aylangan.
Sotuvga qo‘yilgan nusxalar — bu beshinchi avlod Thunderbird modellari hisoblanadi. 1960-yillar oxiriga tegishli avtomobillar birinchi bor mashina harakatiga qarshi yo‘nalishda ochiladigan orqa eshiklar, shuningdek, yopiq holatda faralarni berkitib turuvchi noodatiy radiator panjarasiga ega bo‘lgan.
Suratda tasvirlangan uchta mashinadan faqat ikkitasini xarid qilish mumkin. 1967-yilgi ko‘k T-Bird 390 ot kuchiga ega 6,4 litrli V8 dvigateli bilan jihozlangan bo‘lib, agregat avtomatik transmissiya yordamida boshqariladi. Bir yil keyin konveyerdan chiqqan qizil sedan esa 429 ot kuchiga ega sakkiz silindrli benzin dvigatel yordamida harakatga keladi.
Sotuvchining so‘zlariga ko‘ra, u uchala avtomobilni ham 30 yillar oldin restavratsiya qilish maqsadida sotib olgan. O‘sha vaqtda ularning barchasi soz holatda bo‘lgan va biroz ta’mir talab qilgan. Biroq noma’lum sabablarga ko‘ra, sotuvchi ta’mirlashga kirishmagan va mashinalar 30 yil garajda qolib ketgan.
Uzoq yillar davomida bir joyda turgan mashinalarning mexanizmlarini zang bosgan, biroq kuzovidagi bo‘yoq ideal holatda. Mashinalarning yangi egasi qanaqa texnik muammolarga duch kelishi mumkinligi to‘g‘risida ma’lumot berilmagan. Erkak har bir Ford Thunderbird’ni 2,5 ming dollardan sotishga tayyor.
Avvalroq AQShda o‘z egasini yetti yil davomida kutgan Lotus Evora S modeli nihoyat sotilgani to‘g‘risida xabar berilgandi.
Mavzuga doir:
Izoh (0)