Cyan Racing poyga jamoasi P1800 Cyan — 56 yillik Volvo sportkarining zamonaviylashtirilgan versiyasiga oid yangi video bilan bo‘lishdi. Rolikni suratga olish uchun ko‘k rangli kupe Shvetsiyaning Ore tog‘-chang‘i kurorti yaqinidagi muzlab qolgan ko‘lga yuborilgan, deb xabar beradi Motor.
Retrokupe yaratuvchilarining so‘zlariga ko‘ra, Selsiy bo‘yicha minus 20 daraja sovuqda qor va muz ustida amalga oshirilgan drift P1800 Cyan’ning shassi va “podveska”si to‘g‘ri sozlanganini isbotlashga yordam bergan. Loyiha rahbari Mattias Evenssonning qo‘shimcha qilishicha, bu avtomobillarni zamonaviy yordamchilarsiz boshqaradigan haydovchilar uchun muhim ahamiyatga ega.
“Biz bugungi kundagi aksariyat mashinalardagi kabi elektron tizimlarga ishonib qolmasdan, haydovchiga o‘zining imkoniyatlarini to‘liq o‘rganishiga xizmat qiladigan mustahkam bazaviy konstruksiyaga ega avtomobilni yaratishga urindik”, — deydi Evensson.
Volvo P1800 sportkarining zamonaviylashtirilgan versiyasi 2020-yilning sentabrida taqdim etilgandi. Cyan Racing jamoasi original avtomobil shassisidan foydalangan va yuqori mustahkamlikka ega po‘lat yordamida kuchaytirgan. Noldan boshlab yaratilgan karbon kuzov sabab avtomobilning umumiy massasi 990 kilogrammni tashkil etadi.
Orqa uzatmali sportkar mustaqil orqa “podveska”, ikkitalik richag va boshqariladigan amortizatorlarga ega. Mashina 420 ot kuchini (455 Nm) taqdim etishga qodir 2,0 litrli 2017-yilgi Volvo S60 TC1 dvigateli yordamida harakatga keladi. Motor besh pog‘onali Holinger mexanik uzatmalar qutisi yordamida boshqariladi.
Shvetsiya kompaniyasi hozirda P1800 Cyan uchun buyurtmalarni qabul qilishni boshlagan. Hozircha tirajiga aniqlik kiritilmagan modelning narxi 500 ming dollarni tashkil etadi.
Izoh (0)