АҚШда 1967 ва 1968 йилларда ишлаб чиқарилган иккита ноёб Ford Thunderbird сотувга қўйилди. Сўнгги 30 йил давомида автомобиллар гаражда таъмирталаб аҳволда сақланган. Сотувчи автомобилларнинг ҳар бирини 2,5 минг доллардан сотиб юборишга тайёр, деб хабар беради Motor.
Ford Thunderbird Америка маркасининг машҳур модели ҳисобланади. Ярим аср давомида ушбу ном остида бадавлат инсонлар учун улкан орқа узатмали седанлар, купе ва родстерлар ишлаб чиқарилган. Т-Bird Америка автомобиль бозоридаги мазкур сегментнинг асосчисига айланган.
Сотувга қўйилган нусхалар — бу бешинчи авлод Thunderbird моделлари ҳисобланади. 1960 йиллар охирига тегишли автомобиллар биринчи бор машина ҳаракатига қарши йўналишда очиладиган орқа эшиклар, шунингдек, ёпиқ ҳолатда фараларни беркитиб турувчи ноодатий радиатор панжарасига эга бўлган.
Суратда тасвирланган учта машинадан фақат иккитасини харид қилиш мумкин. 1967 йилги кўк Т-Бирд 390 от кучига эга 6,4 литрли В8 двигатели билан жиҳозланган бўлиб, агрегат автоматик трансмиссия ёрдамида бошқарилади. Бир йил кейин конвеердан чиққан қизил седан эса 429 от кучига эга саккиз цилиндрли бензин двигатель ёрдамида ҳаракатга келади.
Сотувчининг сўзларига кўра, у учала автомобилни ҳам 30 йиллар олдин реставрация қилиш мақсадида сотиб олган. Ўша вақтда уларнинг барчаси соз ҳолатда бўлган ва бироз таъмир талаб қилган. Бироқ номаълум сабабларга кўра, сотувчи таъмирлашга киришмаган ва машиналар 30 йил гаражда қолиб кетган.
Узоқ йиллар давомида бир жойда турган машиналарнинг механизмларини занг босган, бироқ кузовидаги бўёқ идеал ҳолатда. Машиналарнинг янги эгаси қанақа техник муаммоларга дуч келиши мумкинлиги тўғрисида маълумот берилмаган. Эркак ҳар бир Ford Thunderbird’ни 2,5 минг доллардан сотишга тайёр.
Аввалроқ АҚШда ўз эгасини етти йил давомида кутган Lotus Evora S модели ниҳоят сотилгани тўғрисида хабар берилганди.
Мавзуга доир:
Изоҳ (0)