Хоразм вилоятининг Урганч шаҳридаги оҳак цехи газ таъминотига ноқонуний уланиб олгани аниқланди, дея хабар бермоқда Энергетика вазирлиги.
Маълум қилинишича, 2021 йилнинг 15 февралидан 16 февралига ўтар кечаси «Ҳудудгаз Хоразм» газ таъминоти филиалининг моддий ресурслардан оқилона фойдаланиш ва коррупцияга қарши сиёсатни амалга ошириш бўлими ДХХнинг Хоразм вилояти бошқармаси ходимлари билан ҳамкорликда Урганч туманида табиий газдан ноқонуний фойдаланиш ҳолатларини аниқлаш бўйича рейд тадбирлари ўтказди.
Текширув давомида Урганч туманининг Беговот қишлоғи, «Қўнғирот» маҳалласида жойлашган оҳак ишлаб чиқариш цехида яширин йўллар билан, табиий газ ҳисоблагичисиз, юқори босимли газ тармоғига Д-50 миллиметр бўлган полиэтилен қувур ёрдамида ноқонуний уланиб, 10 дона қўлбола ёндиргичдан фойдаланган ҳолда оҳак пиширилаётганлиги аниқланди.
Таъкидланишича, ушбу оҳак ишлаб чиқариш цехи 2020 йилнинг қиш мавсумида кафолатланмаган истеъмолчи сифатида табиий газ таъминотидан узилган. Ҳозирда мазкур истеъмолчи табиий газ тармоғидан ажратилган. Ҳисоб-китобларга кўра, газ таъминоти ташкилотига етказилган зарар миқдори 1,4 миллиард сўмни ташкил этди.
Бундан аввал фуқароларнинг газга ноқонуний уланиши «Ҳудудгаз Самарқанд» газ таъминоти филиалига 393 миллион сўм зарар етказгани, Бухорода портлаш содир бўлган кўп қаватли уйда табиий газ бўйича синовлар тегишли идоралар рухсатисиз амалга оширилгани ҳамда Ўзбекистонда электр энергияси ва табиий газ бозорини тартибга солувчи орган ташкил этилиши ҳақида хабар берилганди.
Изоҳ (0)