Kanadada eng uzoq davom etgan xokkey matchi bo‘yicha yangi jahon rekordi o‘rnatildi. Bu haqda CBC telekanaliga tayanib, Meduza xabar berdi.
Alberta provinsiyasidagi Edmonton shahridan bo‘lgan 40 nafar havaskor xokkeychi ikki jamoaga — “Umid” (Team Hope) va “Shifo” (Team Cure) bo‘linib, bir-biriga qarshi maydonda 252 soat o‘ynadi.
4-fevral kuni boshlangan o‘yin 15-fevral tongida yakunlandi. Matchdagi hisob “Umid” foydasiga — 2649:2528. Xokkeychilar ko‘chadagi havo harorati Selsiy bo‘yicha -55 darajaga yetgan kechalarda ham o‘yinni davom ettirgan.
Koronavirus cheklovlari sabab match tomoshabinlarsiz o‘tkazilgan, biroq YouTube orqali translyatsiya amalga oshirilgan. O‘yin yakuni mushakbozlik bilan nishonlangan.
https://www.instagram.com/p/CLUQMBIgOcS/
https://www.instagram.com/p/CLUdYLogKCd/
Bu kabi tadbir yettinchi marotaba o‘tkazilmoqda. Uni “Edmonton Oylers” MXL jamoasining shifokori Brent Saik xayriya maqsadlarida o‘ylab topgan.
O‘yin davomida Alberta universitetidagi onkologik kasalliklarga qarshi kurash sohasidagi tadqiqotlar uchun xayriya pullari yig‘ilgan. Bu safar tashkilotchilar 1,8 million dollar to‘plashga muvaffaq bo‘lgan. 2003-yildan buyon, Edmontonda bu kabi xokkey marofonlarini o‘tkazish boshlanganidan beri saratonni davolashga jami 5,5 million dollardan ortiq mablag‘ to‘plagan. Xayriyani match tashkilotchilarining sayti orqali amalga oshirish mumkin.
E’tiborli jihati, Saikning safdoshlari Ginnesning rekordlar kitobidagi o‘z rekordlarini yangilagan. 2018-yilning fevralida bo‘lib o‘tgan match 251 soat 7 daqiqa-yu 58 soniya davom etgandi.
Izoh (0)