Канадада тарихдаги энг узоқ давом этган хоккей матчи ўтказилди. У 252 соат давом этди

Канадада энг узоқ давом этган хоккей матчи бўйича янги жаҳон рекорди ўрнатилди. Бу ҳақда CBC телеканалига таяниб, Meduza хабар берди.

Альберта провинциясидаги Эдмонтон шаҳридан бўлган 40 нафар ҳаваскор хоккейчи икки жамоага — «Умид» (Теam Hope) ва «Шифо» (Теam Cure) бўлиниб, бир-бирига қарши майдонда 252 соат ўйнади.

4 февраль куни бошланган ўйин 15 февраль тонгида якунланди. Матчдаги ҳисоб «Умид» фойдасига — 2649:2528. Хоккейчилар кўчадаги ҳаво ҳарорати Цельсий бўйича -55 даражага етган кечаларда ҳам ўйинни давом эттирган.

Коронавирус чекловлари сабаб матч томошабинларсиз ўтказилган, бироқ YouTube орқали трансляция амалга оширилган. Ўйин якуни мушакбозлик билан нишонланган.

https://www.instagram.com/p/CLUQMBIgOcS/

https://www.instagram.com/p/CLUdYLogKCd/

Бу каби тадбир еттинчи маротаба ўтказилмоқда. Уни «Эдмонтон Ойлерс» МХЛ жамоасининг шифокори Брент Саик хайрия мақсадларида ўйлаб топган.

Ўйин давомида Альберта университетидаги онкологик касалликларга қарши кураш соҳасидаги тадқиқотлар учун хайрия пуллари йиғилган. Бу сафар ташкилотчилар 1,8 миллион доллар тўплашга муваффақ бўлган. 2003 йилдан буён, Эдмонтонда бу каби хоккей марофонларини ўтказиш бошланганидан бери саратонни даволашга жами 5,5 миллион доллардан ортиқ маблағ тўплаган. Хайрияни матч ташкилотчиларининг сайти орқали амалга ошириш мумкин.

Эътиборли жиҳати, Саикнинг сафдошлари Гиннеснинг рекордлар китобидаги ўз рекордларини янгилаган. 2018 йилнинг февралида бўлиб ўтган матч 251 соат 7 дақиқаю 58 сония давом этганди.