Жо Байден Оқ уйни «олтин қафас» деб атади

АҚШ президенти Жо Байден Оқ уйдаги ҳаётини «олтин қафас»да яшаш деб атади. Бу ҳақда Associated Press хабар берди.

«Эрталаб уйғонганимда рафиқам Жиллга қараб, ‘қаерга келиб қолдик ўзи?’ дейман», — деган Байден.

Сиёсатчи уй хизматчиларининг уни кутиб туришига ва эгнига пальтосини кийдириб қўйишига ҳанузгача кўника олмаётганини айтган.

Байден Барак Обама маъмуриятида вице-президент бўлиб ишлаган пайтларида Овал офисга юз мартадан кўп ташриф буюргани, аммо илгари Оқ уйнинг турар жой қисмида бўлмаганини таъкидлади. Унинг сўзларига кўра, у ер вице-президент қароргоҳидан сезиларли даражада фарқ қилади.

Шунга қарамай, Байден президентликни аллақачон ўзлаштирганини ишонч билан қайд этди.

«Баъзан, ҳамма нарса жуда тез содир бўлаётгани сабабли тўрт йил ўтиб кетгандек туюлади», — деди у.

20 январь куни бўлиб ўтган инаугурациядан сўнг АҚШ президенти Жо Байден ва унинг рафиқаси Жилл ўзларининг икки немис овчаркаси —Мейжор ва Чемп билан Оқ уйга кўчиб ўтган.

Январь ойи охирида Байден Овал офисдан аввалги президент Дональд Трамп томонидан ўрнатилган диета колаларига буюртма бериш тугмачасини олиб ташлагани маълум бўлди. Шунингдек, у қизил-жигарранг курсини тўқ-жигарранг тусдаги чарм курсига алмаштирди.

3 февраль куни Жо Байден Оқ уйга набираси Бо Байденга атаб беланчак олиб келгани ҳақида хабар берилган.