Buxoroda OAVga yolg‘on ma’lumot bergan maktab direktori vazifasidan olindi. Bu haqda “Daryo”ga viloyat xalq ta’limi boshqarmasi boshlig‘i Dilfuza Mustafoyeva ma’lum qildi.
Foto: Buxoro viloyat xalq ta’limi boshqarmasi
Ta’kidlanishicha, “Daryo” muxbiriga qabristonni obodonlashtirishga sarflanishi lozim bo‘lgan pullar talon-toroj qilingani haqida xabar berib, keyinchalik yolg‘on ma’lumot berishda ayblangan va jarimaga tortilgan maktab direktori ustidan shikoyatlar ham ko‘payib ketgan.
“Tuman va xalq ta’limi tizimi obro‘yiga putur yetkazgan, shuningdek, boshqa xatti-harakatlari bilan ‘Quyi Chuqurak’ mahallasi fuqarolarining noroziligiga ham sabab bo‘lgan maktab direktori faoliyati o‘rganila boshlangach, o‘zi ishdan bo‘shash haqida ariza yozdi. Shunga ko‘ra, u Mehnat kodeksining 97-moddasi (mehnat shartnomasini bekor qilish asoslari) hamda 108-moddasi (mehnat daftarchasini va mehnat shartnomasining bekor qilinishi haqidagi buyruqning nusxasini berish)ga asosan lavozimdan bo‘shatildi”, — deydi Dilfuza Mustafoyeva.
Foto: Buxoro viloyat xalq ta’limi boshqarmasi
Ma’lumot berilishicha, maktab direktori faoliyatidan norozi bo‘lgan 33-maktab jamoasi mas’ullarga bu haqda shikoyat ham qilgan.
“Direktor o‘tgan yilning 24-dekabr kuni xizmat vakolatini suiiste’mol qilib, o‘z xonadoniga tegishli molxonada 11-sinf o‘quvchilarini majburiy mehnatga jalb etgan. Bu viedotasvirlar orqali o‘z isbotini topdi. Mazkur holatga ko‘ra, direktor Shofirkon tuman aholi bandligiga ko‘maklashish markazi qaroriga asosan, Ma’muriy javobgarlik to‘g‘risidagi kodeksning 51-moddasi (mehnatga ma’muriy tarzda majburlash) 2-qismi bilan bazaviy hisoblash miqdorining 70 baravari, ya’ni 15 million 610 ming so‘m jarimaga tortilgan”, — deyiladi boshqarma axborotida.
“Quyi Chuqurak” mahallasi uchastka noziri Aziz Amonov “Daryo” muxbiriga ayni paytda lavozimidan bo‘shatilgan fuqaro Muhammad Aminovning xatti-harakatlari yuzasidan surishtiruv-tergov harakatlari davom etayotganini bildirdi.
