Бухорода ОАВга ёлғон маълумот берган мактаб директори вазифасидан олинди. Бу ҳақда «Дарё»га вилоят халқ таълими бошқармаси бошлиғи Дилфуза Мустафоева маълум қилди.
Таъкидланишича, «Дарё» мухбирига қабристонни ободонлаштиришга сарфланиши лозим бўлган пуллар талон-торож қилингани ҳақида хабар бериб, кейинчалик ёлғон маълумот беришда айбланган ва жаримага тортилган мактаб директори устидан шикоятлар ҳам кўпайиб кетган.
«Туман ва халқ таълими тизими обрўйига путур етказган, шунингдек, бошқа хатти-ҳаракатлари билан ‘Қуйи Чуқурак’ маҳалласи фуқароларининг норозилигига ҳам сабаб бўлган мактаб директори фаолияти ўрганила бошлангач, ўзи ишдан бўшаш ҳақида ариза ёзди. Шунга кўра, у Меҳнат кодексининг 97-моддаси (меҳнат шартномасини бекор қилиш асослари) ҳамда 108-моддаси (меҳнат дафтарчасини ва меҳнат шартномасининг бекор қилиниши ҳақидаги буйруқнинг нусхасини бериш)га асосан лавозимдан бўшатилди», — дейди Дилфуза Мустафоева.
Маълумот берилишича, мактаб директори фаолиятидан норози бўлган 33-мактаб жамоаси масъулларга бу ҳақда шикоят ҳам қилган.
«Директор ўтган йилнинг 24 декабрь куни хизмат ваколатини суиистеъмол қилиб, ўз хонадонига тегишли молхонада 11-синф ўқувчиларини мажбурий меҳнатга жалб этган. Бу виэдотасвирлар орқали ўз исботини топди. Мазкур ҳолатга кўра, директор Шофиркон туман аҳоли бандлигига кўмаклашиш маркази қарорига асосан, Маъмурий жавобгарлик тўғрисидаги кодекснинг 51-моддаси (меҳнатга маъмурий тарзда мажбурлаш) 2-қисми билан базавий ҳисоблаш миқдорининг 70 баравари, яъни 15 миллион 610 минг сўм жаримага тортилган», — дейилади бошқарма ахборотида.
«Қуйи Чуқурак» маҳалласи участка нозири Азиз Амонов «Дарё» мухбирига айни пайтда лавозимидан бўшатилган фуқаро Муҳаммад Аминовнинг хатти-ҳаракатлари юзасидан суриштирув-тергов ҳаракатлари давом этаётганини билдирди.
Изоҳ (0)