Rossiyaning “Nornikel” kon-metallurgiya kompaniyasi egalaridan biri Vladimir Potaninning boyligi 30 milliard dollarga yetdi. Bu haqda real vaqt rejimida yangilanib turuvchi Forbes reytingi ma’lumotlariga tayanib, Meduza xabar berdi.
Shu tarzda Potanin tarixda bunday katta boylikka ega bo‘lgan ilk rossiyalikka aylandi.
So‘nggi vaqtlarda metallurgiya sohasidagi narxlarning ko‘tarilishi tufayli tadbirkorning aktivlari qiymati sezilarli darajada oshdi. Yil boshidan beri “Nornikel”ning har bir aksiyasi narxi 23,7 dan 26,3 ming rublgacha oshgan.
Forbes jurnalida yozilishicha, yaqinda sud tomonidan chiqarilgan “yoqilg‘i to‘kilishi oqibatida atrof-muhitga yetkazgan zarari uchun kompaniyani 146 milliard rubl miqdorida jarimaga tortish” haqidagi qaror ham “Nornikel” aksiyalarining o‘sishiga ta’sir qilolmadi.
Ayni paytda Potanin Forbes’ning global reytingida 50-o‘rinni egallab turibdi. Amazon asoschisi Jeff Bezos 190,8 milliard dollar boyligi bilan reytingda yetakchilik qilmoqda.
2021-yil 7-yanvar kuni SpaceX va Tesla kompaniyalari asoschisi Ilon Mask Bezosni ortda qoldirib, dunyodagi eng boy biznesmenga aylangandi. O‘sha kuni uning boyligi 9 milliard dollarga o‘sib, 186,5 milliard dollarni tashkil etgan. Bloomberg Billionaires Index (BBI) ma’lumotlariga ko‘ra, 10-yanvar kuni Maskning boyligi 200 milliard dollardan oshgan. Biroq 12-yanvar kuni Ilon Mask dunyoning eng boy odami maqomidan mahrum bo‘lib, o‘z o‘rnini yana Bezosga bo‘shatib bergan.
Avvalroq Xitoyning shisha idishlarga qadoqlangan ichimlik suvi ishlab chiqaruvchi Nongfu Spring kompaniyasi asoschisi Chjun Shanshan Bloomberg versiyasiga ko‘ra Osiyoning eng boy odamiga aylangani haqida xabar berilgandi. 2020-yilda xitoylik tadbirkor 70 milliard dollardan ko‘proq mablag‘ ishlab topgan.
Izoh (0)