Россиянинг «Норникель» кон-металлургия компанияси эгаларидан бири Владимир Потаниннинг бойлиги 30 миллиард долларга етди. Бу ҳақда реал вақт режимида янгиланиб турувчи Forbes рейтинги маълумотларига таяниб, Meduza хабар берди.
Шу тарзда Потанин тарихда бундай катта бойликка эга бўлган илк россияликка айланди.
Сўнгги вақтларда металлургия соҳасидаги нархларнинг кўтарилиши туфайли тадбиркорнинг активлари қиймати сезиларли даражада ошди. Йил бошидан бери «Норникель»нинг ҳар бир акцияси нархи 23,7 дан 26,3 минг рублгача ошган.
Forbes журналида ёзилишича, яқинда суд томонидан чиқарилган «ёқилғи тўкилиши оқибатида атроф-муҳитга етказган зарари учун компанияни 146 миллиард рубль миқдорида жаримага тортиш» ҳақидаги қарор ҳам «Норникель» акцияларининг ўсишига таъсир қилолмади.
Айни пайтда Потанин Forbes’нинг глобал рейтингида 50-ўринни эгаллаб турибди. Amazon асосчиси Жефф Безос 190,8 миллиард доллар бойлиги билан рейтингда етакчилик қилмоқда.
2021 йил 7 январь куни SpaceX ва Tesla компаниялари асосчиси Илон Маск Безосни ортда қолдириб, дунёдаги энг бой бизнесменга айланганди. Ўша куни унинг бойлиги 9 миллиард долларга ўсиб, 186,5 миллиард долларни ташкил этган. Bloomberg Billionaires Index (BBI) маълумотларига кўра, 10 январь куни Маскнинг бойлиги 200 миллиард доллардан ошган. Бироқ 12 январь куни Илон Маск дунёнинг энг бой одами мақомидан маҳрум бўлиб, ўз ўрнини яна Безосга бўшатиб берган.
Аввалроқ Хитойнинг шиша идишларга қадоқланган ичимлик суви ишлаб чиқарувчи Nongfu Spring компанияси асосчиси Чжун Шаншан Bloomberg версиясига кўра Осиёнинг энг бой одамига айлангани ҳақида хабар берилганди. 2020 йилда хитойлик тадбиркор 70 миллиард доллардан кўпроқ маблағ ишлаб топган.
Изоҳ (0)