Ўзбекистонда 2020 йилда коррупциявий жиноят содир этган 1 723 нафар мансабдор шахс жиноий жавобгарликка тортилди. Бу ҳақда АОКАда ўтказилган брифингда Бош прокуратура матбуот котиби Ҳаёт Шамсуддинов маълум қилди.
Қайд этилишича, ўтган йилларда очилмай қолган 1 125 та жиноят фош этилиб, қидирувда бўлган 2 446 нафар шахс ушланган.
Бевосита прокуратура органлари томонидан 10 372 та жиноят иши юзасидан тергов ўтказилиб, 6 100 нафар шахсга нисбатан 3 903 та жиноят иши судларга юборилган, жиноят оқибатида етказилган 622,2 миллиард сўмлик зарар айбланувчилардан ундирилган. Прокурорлар ташаббуси билан 57 нафар шахс оқланган.
Хорижий давлатларга айбланувчиларни экстрадиция қилиш ҳақида 194 та илтимоснома юборилиб, 155 нафар шахс Ўзбекистонга этап қилинган.
Шунингдек, 2020 йилда 151 минг 266 нафар фуқаронинг бузилган ҳуқуқи тикланган. 34 482 та қонунга зид ҳуқуқий ҳужжатлар қонунга мувофиқлаштирилган. Аниқланган қонун бузилишларини бартараф этиш юзасидан 18 988 та тақдимнома киритилди, судларга 305 миллиард сўм зарарни ундириш ҳақида 9 779 та ариза берилди. Прокурор текширишлари ва дастлабки тергов давомида жами 736 миллиард сўм зарар ундирилиши таъминланган.
Бундан ташқари, 150 мингдан зиёд ишсиз фуқаронинг бандлиги таъминланиб, оғир ижтимоий вазиятга тушиб қолган 504 нафар аёлга арзон уй-жой ажратилишида амалий ёрдам берилган. 4 минг 397 нафар тадбиркорга кредит, 965 нафарига ер майдони, 249 нафарига бино ажратилишида, 3 минг 675 нафарига коммуникация тармоқларига уланишида ҳамда 2 минг 729 нафарига лицензия ва рухсатномалар олишда амалий кўмак берилган.
Аввалроқ Ўзбекистон коррупция даражаси бўйича Transparency International 2020 йилги рейтингида ўз ўрнини 7 поғонага яхшилаб, 180 та давлат орасида 146-ўринни эгаллагани ҳақида хабар берилган эди.
Адлия вазири иштирокида 15 февраль куни ўтказилган матбуот анжуманида Русланбек Давлетов коррупция масаласи 2020 йилда ҳам энг кўп муҳокама қилинган масалалардан бири бўлгани, жамиятда коррупцияга нисбатан тоқатсизлик ошиб, нафрат ўсганини айтганди.
Изоҳ (0)