Toshkent—Namangan—Andijon yo‘nalishida poyezdlar qatnovi 2021-yil 16-fevraldan boshlab yo‘lga qo‘yiladi. Bu haqda “Daryo” muxbiri Azizbek Abduvaliyev xabar bermoqda.
Namangan temiryo‘l vokzali boshlig‘i Bahodir Nabijonovning so‘zlariga ko‘ra, Toshkent—Namangan—Andijon yo‘nalishidagi yo‘lovchi poyezdi haftaning seshanba va juma kunlari, Andijon—Namangan—Toshkent yo‘nalishidagi poyezd esa chorshanba va shanba kunlari harakatlanadi. Chipta narxi ekonomklass uchun 75 ming so‘m etib belgilangan va sotuvga chiqarilgan.
Poytaxtdan yoki poytaxtga yo‘l oladigan poyezd Namangan shahridagi vokzalga to‘xtab o‘tishi uzoq yillardan beri kutilayotgan voqea hisoblanadi. Hozirda buning uchun viloyatning Pop tumanidagi bekatga borishga to‘g‘ri keladi.
Shuningdek, 15-fevraldan boshlab Andijon—Nukus va Nukus—Andijon yo‘nalishlarida ham poyezdlar qatnovi yo‘lga qo‘yildi. Bu bilan vodiydan Qoraqalpog‘istonga yo‘l olish istagidagi yo‘lovchilarning mushkuli oson bo‘ladi.
“Haftaning har seshanbasida Farg‘ona vodiysi bo‘ylab halqa elektrichka poyezdi qatnovi ham yo‘lga qo‘yildi. Namangandan yo‘lga chiqqan poyezd Andijon, Marg‘ilon va Qo‘qon bekatlarida to‘xtab o‘tib, yana Namanganga qaytib keladi. Chipta narxi ham qimmat emas — 16 ming so‘m”, — deydi Bahodir Nabijonov.
Izoh (0)