Adliya vaziri ishtirokida 15-fevral kuni o‘tkazilgan matbuot anjumanida Ruslanbek Davletov korrupsiya illati va unga jamoatchilik tomonidan bildirilayotgan munosabat haqida so‘z yuritdi, deya xabar bermoqda “Daryo” muxbiri.
“Korrupsiya masalasi 2020-yilda ham eng ko‘p muhokama qilingan masalalardan biri bo‘ldi. Umuman, jamiyatimizda korrupsiyaga nisbatan toqatsizlik oshdi, nafrat o‘sdi. Chunki korrupsiya bilan bog‘liq turli holatlardan jamoatchilik boxabar bo‘lib boryapti, unga o‘z munosabati, nafratini bayon qila olyapti.
Ayniqsa, davlat organlari o‘zlarining davlat xaridlarini ochiqlashni boshlaganidan keyin muammolarning ko‘zga tashlanishi boshlandi. Ya’ni jamoatchilik xalqni puli, budjet puli qayerga qanday sarflanayotganini bila boshladi. Buni ijobiy jarayon, deb baholashimiz kerak va davlat organlari mas’uliyatini oshirishda juda yaxshi mexanizm sifatida o‘rtaga chiqyapti. Adliya vazirligi ham buni, shubhasiz, qo‘llab-quvvatlaydi.
Qayd etish kerakki, shaffoflik bo‘yicha qiladigan ishlarimiz hali ko‘p. Davlat dasturi bilan tanishgan bo‘lsangiz, “Ochiq va hisobdor hukumat” degan dastur ishlab chiqilishi kerak. Biz, Adliya vazirligi, bunga mas’ulmiz va allaqachon loyihani ishlab chiqqanmiz”, — dedi Davletov.
Izoh (0)