Тошкент—Наманган—Андижон йўналишида поездлар қатнови 2021 йил 16 февралдан бошлаб йўлга қўйилади. Бу ҳақда «Дарё» мухбири Азизбек Абдувалиев хабар бермоқда.
Наманган темир йўл вокзали бошлиғи Баҳодир Набижоновнинг сўзларига кўра, Тошкент—Наманган—Андижон йўналишидаги йўловчи поезди ҳафтанинг сешанба ва жума кунлари, Андижон—Наманган—Тошкент йўналишидаги поезд эса чоршанба ва шанба кунлари ҳаракатланади. Чипта нархи экономкласс учун 75 минг сўм этиб белгиланган ва сотувга чиқарилган.
Пойтахтдан ёки пойтахтга йўл оладиган поезд Наманган шаҳридаги вокзалга тўхтаб ўтиши узоқ йиллардан бери кутилаётган воқеа ҳисобланади. Ҳозирда бунинг учун вилоятнинг Поп туманидаги бекатга боришга тўғри келади.
Шунингдек, 15 февралдан бошлаб Андижон—Нукус ва Нукус—Андижон йўналишларида ҳам поездлар қатнови йўлга қўйилди. Бу билан водийдан Қорақалпоғистонга йўл олиш истагидаги йўловчиларнинг мушкули осон бўлади.
«Ҳафтанинг ҳар сешанбасида Фарғона водийси бўйлаб ҳалқа электричка поезди қатнови ҳам йўлга қўйилди. Намангандан йўлга чиққан поезд Андижон, Марғилон ва Қўқон бекатларида тўхтаб ўтиб, яна Наманганга қайтиб келади. Чипта нархи ҳам қиммат эмас — 16 минг сўм», — дейди Баҳодир Набижонов.
Изоҳ (0)