Наманганда байрамона дрон шоу бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Вилоят ҳокимлиги ва Кадастр агентлигининг «Геоинновация маркази» ҳамкорлигида Наманганда илк бор ташкил этилган томошада 500 та дрон учирилди.
Улар ёрдамида 8 та шакл ҳосил қилинди. Ҳумо қуши, туялар карвони, тарихий обидалар, донишманд қария тимсоллари шулар жумласидан.
Белгиланган вақтдан уч соат ўтиб, 21:50 атрофида бошланган шоу 12 дақиқа давом этди. Уни Наманган шаҳридаги «Афсоналар водийси» боғига тўпланган кўплаб томошабинлар бевосита кузатиб борди, маҳаллий телевидение орқали тўғридан-тўғри эфирда олиб кўрсатилди.
«Геоинновация маркази» давлат унитар корхонаси директор ўринбосари Қудрат Қулимбетовга кўра, об-ҳаво шароити тадбир учун бироз ноқулай бўлишига қарамай, бирорта дрон йўқотилмади ва қурилмаларга шикаст етмади.
Эслатиб ўтамиз, олдинроқ Бухорода ўтказилган дрон шоуда учирилган 3 та қурилма ҳалигача топилмагани маълум қилинганди.
Изоҳ (0)