Bonhams auksion uyining Parijdagi filiali Diyego Maradonaga tegishli bo‘lgan Porsche 911 (964) kabrioletini sotishga tayyorgarlik ko‘rmoqda. 1992-yilda ishlab chiqarilgan ikki eshikli model 123 ming kilometrga yaqin yo‘l bosgan bo‘lib, mart boshida sotuvga qo‘yiladi. Bonhams avtomobil uchun kamida 150 ming yevroni qo‘lga kiritishni rejalashtirgan, deb xabar beradi Motor.
Diyego Maradona yangi Porsche 911 Cabriolet’ni 1992-yilning noyabrida sotib olgan. O‘sha vaqtda futbolchi “Sevilya” tarkibida o‘ynagan va nemis avtomobili argentinalikning Yevropadagi asosiy mashinasiga aylangan. Maradona aynan Porsche’ni boshqarib ketayotganida Ispaniya politsiyasining qo‘liga tushgan — futbolchi shahar markazida soatiga 180 kilometr tezlikda harakatlangan.
1993-yilning iyunida Maradona Yevropani tark etgan va o‘z vataniga qaytgan: o‘sha yilning yozida Porsche Mayorka orolidagi xususiy kolleksionerlardan biriga sotilgan. Kabrioletning ikkinchi egasi uni 12 yil asrab-avaylagan, biroq 2013-yildan boshlab 964 Carrera Convertible bir nechta egasini almashtirgan. Bonhams ma’lumotlariga ko‘ra, avtomobil yaxshi holatda saqlangan.
Maradona Turbo Look obvesiga ega nisbatan noyob 964 Carrera 2 Convertible’ga egalik qilgan. Ushbu kabrioletdan jami 1200 nusxa ishlab chiqarilgan. Texnik tavsifi standart: kapoti ostidan 250 ot kuchiga ega 3,6 litrli atmosfera dvigateli o‘rin olgan bo‘lib, u besh pog‘onali mexanik uzatmalar qutisi yordamida boshqariladi.
Bonhams’ning baholashicha, o‘z tarixiga ega noyob Porsche kabrioleti 150-200 ming yevro narxida sotiladi. Auksion Parijda 3-10-mart kunlari oralig‘ida bo‘lib o‘tadi.
Mavzuga doir:
Izoh (0)