Namanganda harakat xavfsizligini ta’minlay olmagan Damas haydovchisi 40 yoshli piyodani urib yubordi. Bu haqda viloyat IIB axborot xizmati xabar berdi.
Ma’lum qilinishicha, 10-fevral kuni soat 12:10 larda Kosonsoy—Iskovot yo‘lining 14-kilometrida avtomashinani ishonch qog‘ozi bilan boshqarib ketayotgan haydovchi harakat xavfsizligini ta’minlay olmay yo‘lning chap tomoniga burilayotib, harakat yo‘nalishiga nisbatan yo‘lning o‘ng tomonida turgan piyodani urib yuborgan. Jabrlanuvchi Yangiqo‘rg‘on tumanida yashovchi, 1981-yilda tug‘ilgan fuqaro bo‘lgan.
Piyoda og‘ir tan jarohati olib, shifoxonada vafot etgan.
Ushbu holat bo‘yicha Yangiqo‘rg‘on tuman IIB huzuridagi Tergov bo‘limi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilgan.
Avvalroq Farg‘ona viloyatining Uchko‘prik tumanida Lacetti yo‘lni kesib o‘tayotgan ayolni urib ketgani, Sirdaryoda Gentra yo‘lni belgilanmagan joydan kesib o‘tayotgan mast erkakni urib ketgani haqida xabar berilgan edi. Har ikki piyoda voqea joyida vafot etgan.
Izoh (0)