Toshkentda haydovchilik guvohnomasini olmagan 17 yoshli haydovchi Cobalt avtomobilida avtobus bekati va yana ikkita yengil mashinaga borib urilib, yo‘l-transport hodisasini sodir etdi, deb xabar beradi IIV YHXBB axborot xizmati.
Ma’lum qilinishicha, 14-fevral kuni soat 19:00 larda Mirzo Ulug‘bek tumani Osiyo ko‘chasida 2003-yilda tug‘ilgan (haydovchilik guvohnomasi olmagan) M.M. ismli haydovchi Cobalt’da harakatlanayotib, Kardiologiya markazi ro‘parasiga yetgan vaqtida boshqaruvni yo‘qotgan va avtobus bekatiga urilgan. Shuningdek, u bekat ortidagi avtoturargohda to‘xtab turgan F.E. boshqaruvidagi Cobalt va fuqaro A.X.ga tegishli yana bir Cobalt bilan ham to‘qnashgan.
To‘qnashuv oqibatida 33 yoshli piyoda tan jarohati olgan bo‘lib, unga birinchi tez tibbiy yordam ko‘rsatilgan.
“Mazkur YTH yuzasidan Toshkent shahar IIBB YHXB tomonidan surishtiruv ishlari olib borilib, hodisa sabablariga aniqlik kiritilmoqda”, — deyiladi xabarda.
Avvalroq Namanganda 20 yoshli yigit boshqaruvidagi Lacetti katta tezlikda reklama ustuniga borib urilishi oqibatida haydovchi va ikki nafar yo‘lovchi voqea joyida vafot etgani to‘g‘risida xabar berilgandi.
Izoh (0)