Har qanday qiyinchiliklarga qaramay sevgisi va bir-birga bo‘lgan hurmati sabab munosabatlarini saqlab qolishga muvaffaq bo‘lgan yulduzlar haqida xabar beramiz.
Merilin Monro va Jo Di Majo
Amerikalik beysbolchi gazetada suratini ko‘rishi bilan Merilinga oshiq bo‘lgan. Jo aktrisa bilan tanishish uchun umumiy tanishlarini ishga solgan. Uchrashganida Monro uning boshqa erkaklar singari yomon niyatda emasligidan hayron qolgan. Keyinroq aktrisa hayotida bunday mehribon va manfaatsiz munosabatda bo‘lgan erkakni ko‘rmaganini ma’lum qilgan. Oradan ikki yil o‘tib juftlik turmush qurgan. Munosabatlar uzoqqa bormagan va 9 oy o‘tib hammasiga nuqta qo‘yilgan. Ularning o‘rtasidagi sevgi shunchalik kuchli bo‘lganidan Jo va Monro 1962-yilda qayta turmush qurishga qaror qilgan, biroq aktrisa marosimdan bir necha kun avval hayotdan ko‘z yumgan. Sevimli ayolining vafot etganidan g‘amga botgan Majo boshqa hech qachon turmush qurmaslikka ont ichgan va 20 yil davomida haftada uch kun Merilinning qabriga guldasta olib borgan.
Meril Strip va Don Gammer
Suratga olish jarayonida Jon Kazale bilan tanishgan aktrisa uning rafiqasi borligi va o‘zidan 14 yosh katta bo‘lishiga ham qaramay, uni sevib qolgan. Jon ham qizga oshiq bo‘lgan va birinchi xotini bilan ajrashib, unga uylanishga va’da bergan. Ammo ularning orzusi ro‘yobga chiqmagan, bunga Kazalening o‘pka saratonidan vafot etgani sabab bo‘lgan. Shundoq ham sevgan insonini yo‘qotganiga chiday olmayotgani yetmagandek, aktrisa uysiz qolgan. Akasi unga sayohatga ketgan do‘stinikida yashab turishni taklif qilgan. Xonadon egasi Don Gammer uyga qaytganida qizni ko‘rib, yoqtirib qolgan. Keyingi kelishida esa qizga turmushga chiqishni taklif qilgan. Sobiq sevgilisining vafotidan yarim yil o‘tib turmushga chiqqan aktrisa 43 yildan buyon baxtli hayot kechiradi. Juftlikning 4 nafar farzandi bor. Meril baxtli oila siri bir-birini tushunishda ekanini aytadi.
Uill Smit va Jada Pinkett-Smit
Uill va Jada 1990-yilda “Beverli-xillzlik shahzoda” serialining suratga olish jarayonida tanishgan. Shundan buyon ularning har ikkisi do‘stona munosabatda bo‘lgan. Uill yillar o‘tib rafiqasi bilan ajrashmoqchi bo‘lganida Jada birinchilardan bo‘lib, uning bu tanlovini qo‘llab-quvvatlagan. Shundan keyin aktyor uning birga hayot kechirishni istagan ayol ekanini tushunib yetgan. Ammo tuyg‘ulari chin ekaniga ishontirishi oson bo‘lmagan. Juftlik 1997-yil arafasida turmush qurgan. Bu vaqtda Jada birinchi farzandiga homilador bo‘lgan. Ikki yil o‘tib esa ularning ikkinchi farzandi dunyoga kelgan. Juftlik 25 yildan buyon baxtli hayot kechirib keladi.
Goldi Xoun va Kurt Rassel
1967-yil suratga olish maydonchasida tanishgan yulduzlar bu vaqtda bir-biriga e’tibor bermagan. Oradan 20 yil o‘tib qayta ko‘rishganida esa ularning har ikkisi ham turmush qurib, ajrashgan bo‘lgan. Bir-biriga oshiq bo‘lgan juftlik 30 yildan buyon birga yashaydi.
Sara Jessika Parker va Mettyu Broderik
Juftlik uchrashguniga qadar sevgidan hafsalasi pir bo‘lishga ulgurgan bo‘lgan. 1997-yilda turmush qurgan yulduzlar oradan 5 yil o‘tib farzandli bo‘lgan. Ammo 2008-yilda aktyorning xiyonati haqida gap tarqalgan. Mettyu bunga Saraning ishi ko‘pligidan e’tibor qilmay qo‘yganini sabab qilib ko‘rsatgan. Sara yechim sifatida erini tark etishdan ko‘ra unga psixoterapevt yordami kerak deb hisoblagan. Qolaversa, surrogat ona yordamidan foydalanish uchun hujjatlar tayyorlashni boshlab yuborgan. Egizak farzandlarning dunyoga kelishi esa oilaviy munosabatlarning yanada mustahkam bo‘lishiga hissa qo‘shgan.
Tom Xenks va Rita Uilson
Tom Kaliforniya universitetida birga o‘qigan Samanta Lyuisga uylangan. Ammo ikki nafar farzandli bo‘lgani ularni baxtli qilib qo‘ymagan. Oilasini boqish uchun kun-u tun ishda bo‘lishi rafiqasiga yoqmagan va besabab janjallar bir-biriga ulangan. Bunday oson bo‘lmagan vaqtda Tom Rita Uilson bilan tanishgan va uni yoqtirib qolgan. Birinchi rafiqasi bilan ajrashishini esa 3 yil kutishiga to‘g‘ri kelgan. Va nihoyat, ular 1988-yilda turmush qurishga muvaffaq bo‘lgan.
Maykl Duglas va Ketrin Zeta-Jons
Yulduzlar “Zorro niqobi” nomli film taqdimotida tanishgan. Uylanganiga qaramay Maykl Ketrinni bir ko‘rishda yoqtirib qolgan. 2000-yilda turmush qurgan juftlik ikki nafar farzandli bo‘lgan. Turli mojarolar yuz berganiga qaramay, mashhurlar 21 yildan buyon birga hayot kechiradi.
Izoh (0)