Ҳар қандай қийинчиликларга қарамай севгиси ва бир-бирга бўлган ҳурмати сабаб муносабатларини сақлаб қолишга муваффақ бўлган юлдузлар ҳақида хабар берамиз.
Мэрилин Монро ва Жо Ди Мажо
Америкалик бейсболчи газетада суратини кўриши билан Мэрилинга ошиқ бўлган. Жо актриса билан танишиш учун умумий танишларини ишга солган. Учрашганида Монро унинг бошқа эркаклар сингари ёмон ниятда эмаслигидан ҳайрон қолган. Кейинроқ актриса ҳаётида бундай меҳрибон ва манфаатсиз муносабатда бўлган эркакни кўрмаганини маълум қилган. Орадан икки йил ўтиб жуфтлик турмуш қурган. Муносабатлар узоққа бормаган ва 9 ой ўтиб ҳаммасига нуқта қўйилган. Уларнинг ўртасидаги севги шунчалик кучли бўлганидан Жо ва Монро 1962 йилда қайта турмуш қуришга қарор қилган, бироқ актриса маросимдан бир неча кун аввал ҳаётдан кўз юмган. Севимли аёлининг вафот этганидан ғамга ботган Мажо бошқа ҳеч қачон турмуш қурмасликка онт ичган ва 20 йил давомида ҳафтада уч кун Мэрилиннинг қабрига гулдаста олиб борган.
Мерил Стрип ва Дон Гаммер
Суратга олиш жараёнида Жон Казале билан танишган актриса унинг рафиқаси борлиги ва ўзидан 14 ёш катта бўлишига ҳам қарамай, уни севиб қолган. Жон ҳам қизга ошиқ бўлган ва биринчи хотини билан ажрашиб, унга уйланишга ваъда берган. Аммо уларнинг орзуси рўёбга чиқмаган, бунга Казаленинг ўпка саратонидан вафот этгани сабаб бўлган. Шундоқ ҳам севган инсонини йўқотганига чидай олмаётгани етмагандек, актриса уйсиз қолган. Акаси унга саёҳатга кетган дўстиникида яшаб туришни таклиф қилган. Хонадон эгаси Дон Гаммер уйга қайтганида қизни кўриб, ёқтириб қолган. Кейинги келишида эса қизга турмушга чиқишни таклиф қилган. Собиқ севгилисининг вафотидан ярим йил ўтиб турмушга чиққан актриса 43 йилдан буён бахтли ҳаёт кечиради. Жуфтликнинг 4 нафар фарзанди бор. Мерил бахтли оила сири бир-бирини тушунишда эканини айтади.
Уилл Смит ва Жада Пинкетт-Смит
Уилл ва Жада 1990 йилда «Беверли-хиллзлик шаҳзода» сериалининг суратга олиш жараёнида танишган. Шундан буён уларнинг ҳар иккиси дўстона муносабатда бўлган. Уилл йиллар ўтиб рафиқаси билан ажрашмоқчи бўлганида Жада биринчилардан бўлиб, унинг бу танловини қўллаб-қувватлаган. Шундан кейин актёр унинг бирга ҳаёт кечиришни истаган аёл эканини тушуниб етган. Аммо туйғулари чин эканига ишонтириши осон бўлмаган. Жуфтлик 1997 йил арафасида турмуш қурган. Бу вақтда Жада биринчи фарзандига ҳомиладор бўлган. Икки йил ўтиб эса уларнинг иккинчи фарзанди дунёга келган. Жуфтлик 25 йилдан буён бахтли ҳаёт кечириб келади.
Голди Хоун ва Курт Рассел
1967 йил суратга олиш майдончасида танишган юлдузлар бу вақтда бир-бирига эътибор бермаган. Орадан 20 йил ўтиб қайта кўришганида эса уларнинг ҳар иккиси ҳам турмуш қуриб, ажрашган бўлган. Бир-бирига ошиқ бўлган жуфтлик 30 йилдан буён бирга яшайди.
Сара Жессика Паркер ва Мэттью Бродерик
Жуфтлик учрашгунига қадар севгидан ҳафсаласи пир бўлишга улгурган бўлган. 1997 йилда турмуш қурган юлдузлар орадан 5 йил ўтиб фарзандли бўлган. Аммо 2008 йилда актёрнинг хиёнати ҳақида гап тарқалган. Мэттью бунга Саранинг иши кўплигидан эътибор қилмай қўйганини сабаб қилиб кўрсатган. Сара ечим сифатида эрини тарк этишдан кўра унга психотерапевт ёрдами керак деб ҳисоблаган. Қолаверса, суррогат она ёрдамидан фойдаланиш учун ҳужжатлар тайёрлашни бошлаб юборган. Эгизак фарзандларнинг дунёга келиши эса оилавий муносабатларнинг янада мустаҳкам бўлишига ҳисса қўшган.
Том Хэнкс ва Рита Уилсон
Том Калифорния университетида бирга ўқиган Саманта Льюисга уйланган. Аммо икки нафар фарзандли бўлгани уларни бахтли қилиб қўймаган. Оиласини боқиш учун кун-у тун ишда бўлиши рафиқасига ёқмаган ва бесабаб жанжаллар бир-бирига уланган. Бундай осон бўлмаган вақтда Том Рита Уилсон билан танишган ва уни ёқтириб қолган. Биринчи рафиқаси билан ажрашишини эса 3 йил кутишига тўғри келган. Ва ниҳоят, улар 1988 йилда турмуш қуришга муваффақ бўлган.
Майкл Дуглас ва Кэтрин Зета-Жонс
Юлдузлар «Зорро ниқоби» номли фильм тақдимотида танишган. Уйланганига қарамай Майкл Кэтринни бир кўришда ёқтириб қолган. 2000 йилда турмуш қурган жуфтлик икки нафар фарзандли бўлган. Турли можаролар юз берганига қарамай, машҳурлар 21 йилдан буён бирга ҳаёт кечиради.
Изоҳ (0)