Xalq deputatlari Buxoro shahar Kengashining o‘ttizinchi sessiyasi 13-fevral kuni bo‘lib o‘tdi, deya xabar bermoqda shahar hokimligi matbuot xizmati.
Unda mahalliy kengash deputatlari, shahar hokimining o‘rinbosarlari, huquqni muhofaza qiluvchi organlar rahbarlari, jamoatchilik tashkilotlari hamda ommaviy axborot vositalari vakillari ishtirok etdi.
Sessiyada viloyat hokimining birinchi o‘rinbosari Nozimjon Xolmurodov so‘zga chiqib, Buxoro shahri nafaqat viloyatda balki respublikada ham o‘z o‘rni va salohiyatiga ega hududlardan biri ekanligini ta’kidladi.
Shuningdek, hududda ko‘p yillar davomida yig‘ilib qolgan muammolar, ijtimoiy-iqtisodiy sohalar rivojiga turtki bo‘layotgan masalalar haqida ham so‘z bordi. Kamchiliklarni bartaraf etish, shaharga hudud va aholi vakillarini biladigan, tushunadigan rahbar kerak ekanligi qayd etildi.
Sessiyada tashkiliy masala ko‘rilib, Buxoro viloyat hokimining 2021-yil 12-fevraldagi tegishli qaroriga asosan Buxoro shahar hokimi lavozimiga O‘tkir Hikmatovich Jumayevni tasdiqlash masalasi ovozga qo‘yilgan.
Nomzod deputatlar tomonidan bir ovozdan tasdiqlangan.
Sessiya yakunida O‘tkir Jumayev so‘zga chiqib, o‘ziga bildirilgan ishonchni oqlashga, shaharni ijtimoiy-iqtisodiy rivojlantirish, aholi turmush darajasini yaxshilash, kambag‘allikni qisqartirish, xorijiy investitsiyalarni jalb qilish, eksport salohiyatini oshirish va budjetga soliq tushumini ta’minlash, aholining tadbirkorlik tashabbuslarini qo‘llab-quvvatlash, yangi ish o‘rinlarini yaratish uchun bor kuch hamda bilimini safarbar qilishini bildirdi.
Bundan avval Ulug‘bek Qosimov Toshkent shahar prokurori lavozimiga, Bektemir tumaniga yangi hokim hamda Xayrulla Bozorovning birinchi o‘rinbosari Farg‘ona shahriga hokim etib tayinlangani haqida xabar berilgandi.
Izoh (0)