Korrupsiyaga qarshi kurashish agentligi Navoiy va Andijondagi tenderlarga oid huquqbuzarliklar bo‘yicha hisobotni e’lon qildi

Korrupsiyaga qarshi kurashish agentligi 2021-yilning yanvar oyida davlat xaridlari sohasida “Korrupsiyasiz soha” loyihasi doirasida amalga oshirilgan ishlariga oid hisoboti bilan bo‘lishdi.

Eslatib o‘tamiz, 6—11-yanvar kunlari Navoiy viloyat hokimligi “Yagona buyurtmachi xizmati” injiniring kompaniyasi mansabdorlariga tegishli deb gumon qilingan qurilish sohasidagi tadbirkorlik subyektlari tomonidan davlat buyurtmalari qonun talablariga zid ravishda qo‘lga kiritilgani haqidagi xabarlar berilgandi.

O‘rganishlar jarayonida Navoiy viloyat hokimligi “Yagona buyurtmachi xizmati” injiniring kompaniyasi mansabdor shaxslari tomonidan manfaatlar to‘qnashuviga yo‘l qo‘ygan holda Navoiy Tears Invest MChJ bilan qiymati 38 milliard so‘mlik jami 11 ta qurilish obyektlari bo‘yicha shartnomalar tuzilgani aniqlangan. O‘rganishlar davomida jami 1,588 milliard so‘mlik moliyaviy xato va kamchiliklarga yo‘l qo‘yilgani ma’lum bo‘lgan.

Shu kabi holat, Navoiy viloyat hokimligi “Yagona buyurtmachi xizmati” injiniring kompaniyasi tomonidan “Mexrangez B-2002” MChJ bilan qiymati 4,7 milliard so‘mlik 2 ta qurilish obyektlari bo‘yicha shartnomalar tuzilganligi aniqlangan. O‘rganishlar davomida jami 58,7 million so‘mlik xato va kamchiliklar aniqlangan.

Shuningdek, Korrupsiyaga qarshi kurashish agentligi tomonidan Andijon viloyat hokimligi “Yagona buyurtmachi xizmati” injiniring kompaniyasi, “Qishloq qurilish invest” MChJ IK Andijon viloyat filiali, Andijon viloyati qurilish bosh boshqarmasi mansabdor shaxslariga tegishli qurilish korxonalari tomonidan davlat buyurtmalari qonun talablariga zid ravishda qo‘lga kiritilganligi holatlari yuzasidan Hisob palatasi va boshqa vazirlik hamda idoralar bilan hamkorlikda ishchi guruh tuzilgan holda o‘rganishlar olib borilmoqda.

O‘rganishlar jarayonida Andijon viloyat hokimligi “Yagona buyurtmachi xizmati” injiniring kompaniyasi buyurtmasi asosida shartnoma qiymati  139,7 milliard so‘mlik 17 ta, “Qishloq qurilish invest” MChJ IK Andijon viloyat filiali buyurtmasi asosida 3,2 milliard so‘mlik 1 ta qurilish obyektlari qamrab olingan.

Ma’lum bo‘lishicha, Andijon viloyati “Yagona buyurtmachi xizmati” injiniring kompaniyasi buyurtmachiligida 2019—2020-yillarda jami 541 ta obyektlarda 480,4 milliard so‘m, shundan 2019-yilda 321 ta obyektlarda 287 milliard so‘m hamda 2020-yilda 220 ta obyektlarda 196,4 milliard so‘m respublika va mahalliy budjet mablag‘lari hisobidan qurilish-montaj ishlari olib borilgan.

Agentlik xodimlari tomonidan o‘rganilganda, Andijon viloyati “Yagona buyurtmachi xizmati” injiniring kompaniyasi buyurtmachiligida 2019—2020-yillar davomida 6 ta qurilish jamiyatlari tomonidan jami 53 ta obyektlarda 171,5 milliard so‘mlik (umumiy qiymatga nisbatan 35 foizni tashkil etadi) tender (tanlov) savdolari qo‘lga kiritilgani ma’lum bo‘lgan.

O‘rganishda qurilish obyektlariga nisbatan o‘tkazilgan tender (tanlov)larda manfaatlar to‘qnashuviga yo‘l qo‘yilganligi, odob-axloq qoidalari qo‘pol ravishda buzilganligi, tender jarayonini o‘tkazish va tegishli hujjatlarni rasmiylashtirishda qator qonunbuzilishi holatlariga yo‘l qo‘yilganligi aniqlangan.

Jumladan, Andijon viloyati “Yagona buyurtmachi xizmati” injiniring kompaniyasi direktori M.Q., direktor o‘rinbosari M.K., Qurilish bosh boshqarmasining boshlig‘i R.X., “Qishloq qurilish invest” MChJ IK Andijon viloyat filiali direktori R.D. xizmat faoliyatini olib borishda manfaatlar to‘qnashuviga yo‘l qo‘yib, o‘zi yoki yaqin qarindoshlariga qarashli firmalarni tender (tanlov)larda qatnashishiga yo‘l qo‘ygan va oqibatda ushbu firmalar tender (tanlov)larda g‘olib bo‘lgan.

Shuningdek, “Jahon ma’mur qurilish” MChJ va “Shahrixon qurilish grant” MChJ qatnashgan 7 ta tanlov va tenderlarda kafillanganlik holatlari mavjud.

Bundan tashqari, 18 ta tanlov va tenderlarni o‘tkazish jarayonlarida “Davlat xaridlari to‘g‘risida”gi qonun va boshqa qonunosti normativ hujjatlar talablari buzilgan. Yoki ayrim ishtirokchi tadbirkorlar tanlov va tenderga korxonaning moliyaviy natijalari to‘g‘risidagi, buxgalteriya balansi, ishchilar soni to‘g‘risidagi hisobotlarni noto‘g‘ri topshirgan.

O‘rganilgan 12 ta qurilish obyektlari bo‘yicha loyiha smeta hujjatlari ishlab chiqilishida qurilish materiallari narxlari noto‘g‘ri qabul qilinishi natijasida qurilish obyektlari loyihasi qiymati 9,4 milliard so‘mga ortib ketgan.

Qurilish sohasida nazorat inspeksiyasi tomonidan o‘tkazilgan o‘rganishlar natijasida, Qo‘rg‘ontepa tumanida joylashgan 2-sonli maktabgacha ta’lim muassasasida 3,6 million so‘m, Andijon viloyati Qo‘rg‘ontepa tumanidagi 5-sonli umumta’lim maktabida 20,5 million so‘m, Baliqchi tumanidagi 35-sonli umumta’lim maktabida 2,9 million so‘m, Shahrixon tumanidagi tibbiyot birlashmasi 2-sonli tug‘ruqxona kompleksida 30,9 million so‘m, jami 4 ta qurilish obyektlarida 57,9 million so‘m miqdorda sifatsiz ishlar amalga oshirilgani ma’lum bo‘lgan.

Barcha 18 ta qurilish obyektlarining 11 tasi foydalanishga topshirilgan bo‘lib, dastlabki bosqichda ulardan 4 tasida nazorat o‘lchovi o‘tkazilgan.

Nazorat o‘lchovi natijasida Qo‘rg‘ontepa tumanida joylashgan 2-sonli maktabgacha ta’lim muassasasida 335 million so‘m, Baliqchi tumanda joylashgan 35-sonli umumta’lim maktabida 354 million so‘m, Qo‘rg‘ontepa tumanidagi 5-sonli umumta’lim maktabida 408 million so‘m, Shahrixon tumanida joylashgan tibbiyot birlashmasi 2-sonli tug‘ruqxona kompleksida 389 million so‘m, jami 4 ta qurilish obyektlarida 1,486 milliard so‘mlik ishlar kam bajarilgani aniqlangan.

O‘rganishlar davomida aniqlangan yuqoridagi holatlar bo‘yicha tergovga qadar tekshiruv harakatlari o‘tkazish lozimligini inobatga olinib, to‘plangan hujjatlar Bosh prokuraturaga taqdim etilgan. Hozirgi kunda 4 ta qurilish obyektlari bo‘yicha aybdor shaxslarga Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi va 209-moddasi (mansab soxtakorligi) 1-qismi bilan jinoyat ishi qo‘zg‘atildi va hozirda tergov harakatlari olib borilmoqda.