Oliy va o‘rta maxsus ta’lim vazirligi 10-fevral kuni bir dona Malibu-2 xizmat mashinasini xarid qilish uchun shartnoma tuzdi. Bu haqda Davlat xaridlari portalida ma’lumot berilgan.
Qayd etilishicha, xizmat mashinasining narxi 325 million 950 ming so‘mga teng.
Ma’lumot uchun, vazirlikka 14-yanvar kuni Abduqodir Toshqulov rahbar etib tayinlangan edi.
Eslatib o‘tamiz, 2020-yil noyabr oyi boshida Zarbdor tumani hokimi Zafar Ro‘ziyev Captiva xizmat mashinasi bo‘la turib, 370 million so‘mga Trailblazer, shuningdek, pandemiya davrida Uchqo‘rg‘on, Pop, Qo‘shrabot va Narpay tumanlari hokimliklari ham Trailblazer sotib olgani to‘g‘risida xabar berilgandi. Denov tumani hokimligi esa karantin kuchaytirilgan paytda — 2020-yilning iyulida 398 million so‘mga Trailblazer LTZ-AT, Namangan viloyati hokimligi ham iyulda budjet mablag‘lari hisobidan 1 milliard 579 million so‘mga Toyota LC200 avtomobilini hamda sentabr oyida qariyb 400 million so‘mga Trailblazer LTZ-AT rusumli avtomobil xarid qilgan.
Bundan tashqari, Mirzacho‘l tumani hokimligi 370 million so‘mga Trailblazer, Qashqadaryo viloyati hokimligi hokim o‘rinbosariga 349 million so‘mga Equinox, hokimning xotin-qizlar masalalari bo‘yicha maslahatchisiga, yordamchisi hamda ishlar boshqarmasi boshlig‘iga 621 million so‘mga 3 ta Tracker xizmat mashinalari sotib olgan.
Shuningdek, Qoraqalpog‘istonda tayinlanganiga bir oy bo‘lgan hokim 349 million so‘mlik Equinox’ga buyurtma bergani haqida xabarlar tarqagandi. “Chimboydagi o‘quvchilar 8 kilometr uzoqlikdagi maktabga eshakda borishmoqda” sarlavhasi ostidagi ijtimoiy tarmoqlardagi xabardan keyin hokim Aybek Tajetdinov Equinox’ni xarid qilish fikridan qaytgandi.
Korrupsiyaga qarshi kurashish agentligi direktori Akmal Burhonov mansabdor shaxslar pandemiya sharoitida davlat mablag‘larining samarali sarflanishi naqadar muhim ekanligini to‘la anglab yetmayotgani, qimmat narxlardagi xizmat avtotransportlarining xarid qilinayotganiga munosabat ham bildirgan. Shuningdek, Prezidentning yangi qaroriga ko‘ra, tuman hokimlariga narxi 267,5 million so‘mdan yuqori xizmat avtomobili sotib olish taqiqlanishi mumkinligi ma’lum qilingandi.
Izoh (0)