Олий ва ўрта махсус таълим вазирлиги 326 млн сўмлик Malibu-2 харид қилиш учун шартнома тузди

Олий ва ўрта махсус таълим вазирлиги 10 февраль куни бир дона Malibu-2 хизмат машинасини харид қилиш учун шартнома тузди. Бу ҳақда Давлат харидлари порталида маълумот берилган.

Қайд этилишича, хизмат машинасининг нархи 325 миллион 950 минг сўмга тенг.

Маълумот учун, вазирликка 14 январь куни Абдуқодир Тошқулов раҳбар этиб тайинланган эди.

Эслатиб ўтамиз, 2020 йил ноябрь ойи бошида Зарбдор тумани ҳокими Зафар Рўзиев Captiva хизмат машинаси бўла туриб, 370 миллион сўмга Trailblazer, шунингдек, пандемия даврида Учқўрғон, Поп, Қўшработ ва Нарпай туманлари ҳокимликлари ҳам Trailblazer сотиб олгани тўғрисида хабар берилганди. Денов тумани ҳокимлиги эса карантин кучайтирилган пайтда — 2020 йилнинг июлида 398 миллион сўмга Trailblazer LTZ-AT, Наманган вилояти ҳокимлиги ҳам июлда бюджет маблағлари ҳисобидан 1 миллиард 579 миллион сўмга Toyota LC200 автомобилини ҳамда сентябрь ойида қарийб 400 миллион сўмга Trailblazer LTZ-AT русумли автомобиль харид қилган.

Бундан ташқари, Мирзачўл тумани ҳокимлиги 370 миллион сўмга Trailblazer, Қашқадарё вилояти ҳокимлиги ҳоким ўринбосарига 349 миллион сўмга Equinox, ҳокимнинг хотин-қизлар масалалари бўйича маслаҳатчисига, ёрдамчиси ҳамда ишлар бошқармаси бошлиғига 621 миллион сўмга 3 та Tracker хизмат машиналари сотиб олган.

Шунингдек, Қорақалпоғистонда тайинланганига бир ой бўлган ҳоким 349 миллион сўмлик Equinox’га буюртма бергани ҳақида хабарлар тарқаганди. «Чимбойдаги ўқувчилар 8 километр узоқликдаги мактабга эшакда боришмоқда» сарлавҳаси остидаги ижтимоий тармоқлардаги хабардан кейин ҳоким Айбек Тажетдинов Equinox’ни харид қилиш фикридан қайтганди.

Коррупцияга қарши курашиш агентлиги директори Акмал Бурҳонов мансабдор шахслар пандемия шароитида давлат маблағларининг самарали сарфланиши нақадар муҳим эканлигини тўла англаб етмаётгани, қиммат нархлардаги хизмат автотранспортларининг харид қилинаётганига муносабат ҳам билдирган. Шунингдек, Президентнинг янги қарорига кўра, туман ҳокимларига нархи 267,5 миллион сўмдан юқори хизмат автомобили сотиб олиш тақиқланиши мумкинлиги маълум қилинганди.