Porsche Taycan elektrosedani o‘zi tomonidan o‘rnatilgan dunyo rekordlari qatoriga yana bitta natijani qo‘shib qo‘ydi. Poygachi Lex Kin elektrokarni Luiziana shtatidagi ko‘rgazma zalida soatiga 165,1 kilometr tezlikka chiqarib, Ginnesning rekordlar kitobidan joy oldi, deb xabar beradi Motor.
Rekord Yangi Orleanda joylashgan Amerikadagi eng katta konferens-markazda o‘rnatilgan. Silliqlangan beton quyilgan bino maydoni 93 ming kvadrat metrga teng. Avtopoygachi konuslar bilan belgilangan uchastkani bosib o‘tishi va beton devor qarshisida tormozni bosishga ulgurishi kerak edi. Qutqaruv setkasi yoki boshqa biror himoya vositasining yo‘qligi sportchining xato qilishga haqi yo‘qligidan dalolat bergan.
Rekordni o‘rnatish uchun Lex Kin Porsche Taycan’ning eng kuchli modifikatsiyasi — Turbo S’ni tanlagan. Modelga 71 ot kuchiga ega motor va uglerod-keramikli tormozlar o‘rnatilgan. Elektrokar soatiga 100 kilometr tezlikka 2,8 soniyada erishadi. 200 km/soat masofani model 9,6 soniyada bosib o‘tishga qodir. Ehtiyot chorasi sifatida avtopoygachi superkar shinalarini oldindan qizdirib olgan va tavakkalchilikka asoslangan harakatini boshlagan. Birinchi urinishdayoq poygachi Porsche Taycan Turbo S’ni soatiga 165,1 kilometr tezlikka chiqarib, yangi rekord o‘rnatgan.
Sportchining so‘zlariga ko‘ra, silliqlangan beton ustida harakatlanish unga muz ustidagi poygani eslatib yuborgan. Yopiq binoda o‘rnatilgan bundan oldingi rekord 138,4 km/soatga teng bo‘lib, u 7 yildan buyon yangilanmay kelayotgandi.
Avvalroq Porsche kompaniyasi Britaniyaning Brands Hatch Circuit trassasida Taycan 4S va Turbo S seriyali modellarini bardoshlilik sinovidan o‘tkazib, 13 ta rekord o‘rnatgani to‘g‘risida xabar berilgandi.
Izoh (0)