Tesla lineykasidagi eng arzon elektrokar global modelga aylanadi. Bu haqda kompaniyaning Xitoydagi ofisi rahbari Tom Chjuga tayanib, Motor xabar berdi. Bu “kichik” elektrokar nafaqat Xitoyda, balki butun dunyo bo‘ylab sotuvga chiqishini bildiradi. Modelning taxminiy narxi 25 ming dollar bo‘lib, u hozirda Tesla modellari orasidagi eng arzon hisoblangan Model 3’dan uch barobar arzonroq.
Chju kelajakdagi modelga oid ayrim tafsilotlar bilan bo‘lishgan. U to‘laligicha Xitoyda yaratilmoqda — buning uchun Tesla mamlakatdagi birinchi xorijiy konstruktorlik markazini bunyod etyapti. Hamyonbop elektrokar butun dunyo, jumladan, AQShda ham sotuvga chiqadi.
Boshqa ma’lumotlarga ko‘ra, Amerika kompaniyasi Yevropa bozori uchun Xitoydagi versiyadan farq qiladigan alohida versiyani yaratmoqda. “Xitoycha” Tesla’da mahalliy ishlab chiqaruvchilarning ehtiyot qismlaridan foydalaniladi: aynan shu sabab model narxi ancha arzonlashadi. Bundan tashqari, avvalroq Tesla rahbari Ilon Mask qimmat turuvchi akkumulyatorlarning optimizatsiya qilinishini aytgandi.
Ma’lum qilinishicha, arzon elektromobillarning birinchi partiyasini 2021-yilning birinchi yarmida sinovdan o‘tkazish boshlanadi, savdolar esa uch yil davomida amalga oshiriladi. Yangi model qanday ko‘rinishda bo‘lishi hozircha noma’lum.
Avvalroq Tesla elektrokarlarini bitkoin evaziga xarid qilish yo‘lga qo‘yilgani to‘g‘risida xabar berilgandi.
Izoh (0)