Yevroparlament Belarus AESning ishga tushirilishini to‘xtatishni talab qildi

Yevropa parlamenti Litva bilan chegaraga yaqin joylashgan Ostrovets shahridagi Belarus atom elektr stansiyasi ishga tushirilishini to‘xtatishni talab qildi, deb yozadi “RBK”. Yevroparlament deputatlari AESning xavfsizligi yuzasidan xavotir bildirdi.

Rezolyutsiyani qabul qilishni yoqlab 642 deputat ovoz berdi, 29 nafari qarshi chiqdi, 21 kishi betaraf qoldi.

Parlament a’zolari Belarusni AESni “shoshma-shosharlik bilan foydalanishga topshirganligi” va “reaktorning tez-tez avariyaviy to‘xtab qolishlari va uskunalarning ishlamay qolishi” bo‘yicha rasmiy xabarlar berilmaganligi uchun tanqid qildi. Ular Belarus AES ishga tushirilishini xavfsizlikni oshirish choralarining barchasiga amal qilinmaguniga qadar kechiktirishni talab qilmoqda. Deputatlar Minskni yadroviy va ekologik xavfsizlik bo‘yicha xalqaro standartlarga rioya qilishga chaqirdi.

Jami quvvati 2400 MVt ga teng bo‘lgan ikki reaktorli Belarus AES Grodna viloyatidagi Ostrovets shahri yaqinida qurilgan. Stansiya qurilishida bosh pudratchi sifatida Rossiyaning “Rosatom” davlat korporatsiyasi ishtirok etgan.

2020-yil 7-noyabrida BelAESning birinchi energiya bloki ishga tushirilgan. Bir necha kundan keyin stansiya elektr energiyasi ishlab chiqarishni to‘xtatgan. Belarus Favqulodda vaziyatlar vazirligi Yadro va radiatsiya xavfsizligi departamenti ma’lum qilishicha, elektr energiyasi ishlab chiqarilishining to‘xtatilishi yadro va radiatsiya xavfsizligiga ta’sir o‘tkazmagan. BelAESdagilar AES to‘xtab qolishi sababini sinovlar bilan izohladi. OAVlarga ko‘ra, bir nechta kuchlanish transformatorlarining portlashi yuz bergan. 2021-yilning yanvarida BelAESning birinchi energiya bloki himoya tizimi ishlab ketishi natijasida o‘chirilgan edi.