Misrning Sinay yarimorolidagi Sharm ash-Shayx kurortining atrofi 36 kilometrlik beton devor bilan o‘raldi, bu turistlarning xavfsizligini ta’minlashga yordam beradi. Bu haqda “Interfaks” xabar berdi.
Ta’kidlanishicha, 36 kilometr uzunlikdagi devor kurortni atrofdagi cho‘ldan ayirib turuvchi sim devor va beton to‘siqlardan iborat. Bu qurilish orqali mahalliy hukumat sayyohlarni muhofaza qilish darajasini oshirishni rejalashtirgan. Chunki Sharm ash-Shayx Sinayning radikal isyonchilar harakatlari faol bo‘lgan shimoliy O‘rta Yer dengizi qirg‘oqlaridan atigi 360 kilometr janubda joylashgan.
Endilikda kurortga kirish uchun videokuzatuv kameralari va skanerlar bilan jihozlangan nazorat punktlaridan o‘tish kerak bo‘ladi.
Janubiy Sinay gubernatori Xolid Fudaning so‘zlariga ko‘ra, kurortdagi turistlarga hech narsa xavf solmayapti, bu shunchaki ehtiyot choralari.
“Dam olish maskanlari va radikal isyonchilar to‘plangan joylar orasidagi masofa juda uzoq. Shuningdek, Misr armiyasi Shimoliy va Janubiy Sinayda shay holatda turibdi. Shubhali shaxslar tintuv qilinadi, avtomobillar tekshiriladi, ular osonlikcha kurort hududiga kirolmaydi”, — dedi gubernator.
Mahalliy OAVning xabar berishicha, hukumat 2005-yilda kurort atrofini devor bilan o‘rashni rejalashtirgan, lekin moliyaviy muammolar sababli bu ish ortga surilgan. 2015-yil bortida rossiyalik sayyohlar bo‘lgan aviahalokat oqibatida Misr hukumati bu masalani qayta muhokamaga qo‘ydi. Devor qurilishi 2019-yilda boshlangan edi.
Izoh (0)