Мисрнинг Синай яриморолидаги Шарм аш-Шайх курортининг атрофи 36 километрлик бетон девор билан ўралди, бу туристларнинг хавфсизлигини таъминлашга ёрдам беради. Бу ҳақда «Интерфакс» хабар берди.
Таъкидланишича, 36 километр узунликдаги девор курортни атрофдаги чўлдан айириб турувчи сим девор ва бетон тўсиқлардан иборат. Бу қурилиш орқали маҳаллий ҳукумат сайёҳларни муҳофаза қилиш даражасини оширишни режалаштирган. Чунки Шарм аш-Шайх Синайнинг радикал исёнчилар ҳаракатлари фаол бўлган шимолий Ўрта Ер денгизи қирғоқларидан атиги 360 километр жанубда жойлашган.
Эндиликда курортга кириш учун видеокузатув камералари ва сканерлар билан жиҳозланган назорат пунктларидан ўтиш керак бўлади.
Жанубий Синай губернатори Холид Фуданинг сўзларига кўра, курортдаги туристларга ҳеч нарса хавф солмаяпти, бу шунчаки эҳтиёт чоралари.
«Дам олиш масканлари ва радикал исёнчилар тўпланган жойлар орасидаги масофа жуда узоқ. Шунингдек, Миср армияси Шимолий ва Жанубий Синайда шай ҳолатда турибди. Шубҳали шахслар тинтув қилинади, автомобиллар текширилади, улар осонликча курорт ҳудудига киролмайди», — деди губернатор.
Маҳаллий ОАВнинг хабар беришича, ҳукумат 2005 йилда курорт атрофини девор билан ўрашни режалаштирган, лекин молиявий муаммолар сабабли бу иш ортга сурилган. 2015 йил бортида россиялик сайёҳлар бўлган авиаҳалокат оқибатида Миср ҳукумати бу масалани қайта муҳокамага қўйди. Девор қурилиши 2019 йилда бошланган эди.
Изоҳ (0)