Latviya ikki hafta davomida Yevropa Ittifoqining barcha mamlakatlari, Yevroiqtisodiyot hududi, Shveysariya va Buyuk Britaniyadan keluvchilarni muhim bo‘lmagan sabablarga ko‘ra mamlakatga kirishini taqiqladi. Taqiq 11-fevraldan 25-fevralgacha amal qiladi, deb yozmoqda “Korrespondent.net”.
Favqulodda holatni joriy etish to‘g‘risidagi ushbu farmonga kiritilgan o‘zgartirishlar shuni ko‘rsatadiki, Latviyaga kirish uchun faqat favqulodda va muhim sabablar, jumladan, o‘qish, oilaga qaytish, davolanish, tranzit yoki voyaga yetmaganlarni kuzatib qo‘yish, doimiy yashash joyiga qaytish yoki dafn marosimida qatnashish singari holatlarda ruxsat beriladi.
O‘zgartirishlar, shuningdek, Britaniya, Irlandiya va Portugaliyaga boruvchi va ushbu mamlakatlardan keluvchi xalqaro yo‘lovchilarni tashish vaqtincha aeroport, dengiz porti va avtobuslar orqali amalga oshirilishini nazarda tutadi. Chunki mazkur mamlakatlarda yangi shtammlar keng tarqalgan.
Shuningdek, Transport vazirligi ruxsati bilan yo‘lovchi tashish besh kishidan ko‘p bo‘lmagan holda xususiy havo transporti va biznes-reyslar, favqulodda yo‘lovchi tashish tranzitlari, xodimlarni ish joyiga yetkazish uchun, sportchilarni chet elda o‘tkaziladigan musobaqalar va Latviyadagi xalqaro musobaqalarda qatnashish uchun maxsus tashkillashtirilgan holatda amalga oshirilishi mumkin.
COVID-19 bilan kasallangan fuqarolar Latviyaga quruqlik orqali faqatgina shaxsiy transportda qaytishi mumkin. Bundan tashqari, ushbu cheklovlar ikki haftadan ko‘proq davom etishi mumkin, ammo bu epidemiologik vaziyatga bog‘liq.
Eslatib o‘tamiz, Latviya koronavirus epidemiyasi sababli mamlakatda joriy qilingan favqulodda holat rejimini 6-aprelga qadar uzaytirgan edi. Yevropa Ittifoqi esa Shengen hududiga kirish uchun qo‘shimcha cheklovlarni joriy etgan.
Buyuk Britaniyada esa 15-fevraldan boshlab COVID-19 xavfi yuqori bo‘lgan davlatlardan tashrif buyuruvchilar uchun ikki haftalik majburiy karantin joriy etiladi. “Qora ro‘yxat”dagi mamlakatlardan qaytgan fuqarolar o‘n kunni “COVID-mehmonxonalar”da o‘tkazishi kerak.
Izoh (0)