Qirg‘iziston prezidenti Sadir Japarov 2021-yil 1-martga qadar davlat idoralari tomonidan qog‘oz hujjatlarni talab qilish tartibini bekor qilish haqida farmon berdi. Farmonga ko‘ra, qog‘oz hujjatlar elektron shaklga o‘zgartirilib, ma’lumotlar idoralararo “Tunduk” aloqa tizimi orqali almashtiriladi, deb yozmoqda Kloop.
Shuningdek, Oliy sudning fuqarolar va yuridik shaxslarga nisbatan ijro haqidagi ma’lumotlari davlat portaliga joylashtirilib, sudlanganlik to‘g‘risidagi guvohnomalar to‘liq avtomatlashtiriladi.
Bundan tashqari, hukumat 1-mayga qadar ID karta, haydovchilik guvohnomasi va transportni ro‘yxatdan o‘tkazganlik to‘g‘risidagi guvohnomalarning elektron shaklini joriy qilish bilan bog‘liq masalalarni hal qiladi. Natijada qirg‘izistonlik haydovchilar haydovchilik guvohnomasi va “texpasport”larni o‘zlari bilan olib yurishi shart bo‘lmaydi.
Japarovning farmoniga binoan, 1-maydan boshlab ID kartalar nafaqat 16 yoshga to‘lganlarga, balki pensionerlar, barcha toifadagi nogironlar, yordamga muhtoj fuqarolarga hamda Ulug‘ Vatan urushi va Botken voqealari ishtirokchilariga ham bepul beriladi.
Shuningdek, hukumatga 2021-yil oxiriga qadar elektron imzolarni sertifikatlash markazini ochish topshirildi.
Avvalroq Qozog‘istonda haydovchilarning guvohnoma va “texpasport”larni olib yurish majburiyati bekor qilingani haqida xabar berilgandi. Ichki ishlar organlari haydovchining shaxsini tasdiqlovchi guvohnomasiga qarab elektron ma’lumotlar bazasi orqali uning hujjatlari bor yoki yo‘qligini tekshiradi.
Izoh (0)